ზურაბიშვილმა იაპონიაში ვიზიტი შეაჯამა

​საქართველოს პრეზიდენტმა იაპონიაში ვიზიტი დაასრულა. სალომე ზურაბიშვილმა ნარუჰიტოს ტახტზე ასვლის ცერემონიას ღირშესანიშნავი, მნიშვნელოვანი მოვლენა უწოდა.

პრეზიდენტის პრესსამსახურის ცნობით, პრეზიდენტმა იაპონიაში პოლიტიკური ხასიათის შეხვედრები გამართა: ტოკიოს მერთან იურიკო კოიკესსთან, პრემიერ მინისტრთან, შინძო აბესთან და ყოფილ პრემიერ-მინისტრთან, იოშირო მორისთან, როგორც 2020 წლის ტოკიოს ოლიმპიური თამაშების საპატიო პრეზიდენტთან, საგარეო საქმეთა მინისტრის მოადგილესთან, იაპონიის საპარლამენტო მეგობრობის ჯგუფის წარმომადგენლებთან და იაპონიის პარლამენტის მრჩეველთა პალატის პრეზიდენტთან, აკიკო სანტოსთან.

სალომე ზურაბიშვილმა აღნიშნა, რომ მისი უმაღლესობა ნარუჰიტოს ტახტზე ასვლის ცერემონია ღირშესანიშნავი მოვლენაა და მნიშვნელოვანი იყო, რომ ამ ცერემონიაში მონაწილეობით საქართველოს გამოეხატა საკუთარი პატივისცემა უძველესი ქვეყნის მიმართ, რაც ძალიან მნიშვნელოვანია ორი ქვეყნის პარტნიორობის განვითარებისთვის. 

პრეზიდენტის განცხადებით, იაპონია საქართველოს მიმართ ძალიან მეგობრულად განწყობილი ქვეყანაა და იაპონიაში საქართველოს ცნობადობის გასაზრდელად, კულტურული და სპორტული მიმართულებით, უფრო მეტი უნდა ვიმუშაოთ.

პრეზიდენტის განცხადებით, იაპონიაში ქართული ღვინის ცნობადობა უკვე მაღალია, თუმცა საჭიროა, იაპონური კომპანიების დაინტერესება ქართული ღვინის იმპორტის გაზრდისა და გააქტიურების თვალსაზრისით, რათა მას უფრო მასშტაბური ხასიათი შეიძინოს.

სალომე ზურაბიშვილი მიიჩნევს, რომ მეტი მუშაობაა საჭირო ქართული კულტურის, სპორტისა და საქართველოს, როგორც ტურისტული ქვეყნის პოპულარიზაციისათვის.

პრეზიდენტის შეფასებით, მისი ვიზიტის მნიშვნელოვან მიმართულებას, სწორედ, სპორტის სფეროში ურთიერთობების გაძლიერება წარმოადგენდა და ამ კუთხით საგულისხმო იყო 2020 წელს ტოკიოს ოლიმპიური თამაშების საორგანიზაციო ჯგუფთან და ტოჩინოშინთან შეხვედრები.

მისი თქმით, ლევან გორგაძე, ტოჩინოშინი ძალიან წარმატებული და დასაფასებელი სპორტსმენია და საქართველოსა და იაპონიის შორის დამაკავშირებელ ხიდს წარმოადგენს.

პრეზიდენტის განცხადებით, მედიაჰოლდინგ ,,ფუჯისთან“ შეხვედრებზე საქართველოში ფილმებისა და სერიალების გადაღების შესაძლებლობები განიხილებოდა.

პრეზიდენტის პრესსამსახურის ცნობით, იაპონელები დაინტერესდნენ ამ მიმართულებით და უახლოეს მომავალში, იაპონელ სპეციალისტთა ჯგუფი საქართველოში ჩამოსვლას გეგმავს.