ბრიუსელში საქართველოს საარჩევნო რეფორმის გაგრძელებისკენ მოუწოდებენ

„იმედგაცრუებაა, რომ მმართველმა პარტიამ საქართველოს პარლამენტში მნიშვნელოვანი რეფორმის გასატარებლად საკმარისი მხარდაჭერა ვერ მოიპოვა“, - ამის შესახებ ევრონესტის საპარლამენტო ასამბლეის პრეზიდენტმა, ევროპარლამენტარმა ანდრიუს კუბილიუსმა განაცხადა. მისი თქმით, შერეული საარჩევნო სისტემიდან პროპორციულზე გადასვლა ქართველი ხალხის მოთხოვნა იყო და პარლამენტმა საკუთარ ამომრჩევლებს არ მოუსმინა. 

„იმედი მაქვს, რომ ეს კენჭისყრა საბოლოო არ იქნება, პარლამენტი ამ საკითხს დაუბრუნდება და კომპრომისს მიაღწევს. ამასობაში პოლიტიკურ უმრავლესობას და ოპოზიციას ამ უკან გადადგმული ნაბიჯით გამოწვეული შეფერხების აღმოსაფხვრელად დისკუსიის დაწყებას ვთავაზობ, რათა შემდეგი საპარლამენტო არჩევნები პროპორციული სისტემით ჩატარდეს, რაც საქართველოს მთავრობის დაპირება იყო და რაზეც ყველა პოლიტიკური მოთამაშე შეთანხმდა“, - აცხადებს კუბილიუსი. 

თბილისში განვითარებულ მოვლენებს ევროსაბჭოს გენერალური მდივნის სპიკერი დანიელ ჰოლტგენიც გამოეხმაურა. „ჩვენ საქართველოს რეფორმების გაგრძელებისკენ მოუწოდებთ, მათ შორის საარჩევნო რეფორმის. ევროპის საბჭო და ვენეციის საბჭო მზად არიან საქართველოს დახმარება გაუწიონ“, - ნათქვამია მის განცხადებაში. 

მანამდე კენჭისყრას ევროპარლამენტის ყოფილი წევრი რებეკა ჰარმსიც გამოეხმაურა. „საქართველოს პარლამენტმა მხარი არ დაუჭირა პროპორციულ საარჩევნო სისტემაზე გადასვლას, რომელსაც ყველა დიდი ხანი ელოდა. საკმაოდ გულდასაწყვეტია. თბილისში კრიტიკული მომენტი დგება. პროპორციულ სისტემაზე გადასვლისთვის ქვეყანა დიდი ხანი ემზადებოდა“, - წერს რებეკა ჰარმსი.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.

საპარლამენტო უმრავლესობა განმარტავს, რა სისტემით ჩატარდება 2020 წლის არჩევნები. განცხადება გაავრცელა მმართველი პარტიის ლიდერმაც. ოპოზიციური პარტიები მხარდამჭერებს პარლამენტთან აქციაზე მისვლისკენ მოუწოდებენ. 

ვინ დაუჭირა მხარი და ვინ იყო პროპორციულ საარჩევნო სისტემაზე გადასვლის წინააღმდეგი, ამ ბმულზე ნახეთ.