ოპოზიცია და სამოქალაქო სექტორი საპროტესტო აქციისთვის ემზადებიან

ოპოზიცია სამოქალაქო სექტორთან ერთად მასშტაბური საპროტესტო აქციისთვის ემზადება. აქციის მონაწილეები ვადამდელი საპარლამენტო არჩევნების პროპორციული საარჩევნო სისტემით ჩატარებას, ცესკოს შემადგენლობის შეცვლასა და დროებითი ტექნიკური მთავრობის შექმნას ითხოვენ.

რუსთაველის გამზირზე 20-მდე კარავია გაშლილი, მათ შორის ერთი დიდი კარავი, რომელშიც ოპოზიციური პარტიების საკონსულტაციო შტაბია განთავსებული. საპროტესტო აქციის მონაწილეები ამბობენ, რომ მოთხოვნების შესრულებამდე აქციას არ შეწყვეტენ და მშვიდობიანი გზით შეასრულებინებენ ხელისუფლებას ამ მოთხოვნებს.

„თქვენ ნახეთ, რომ არის პოლიტიკური პარტიებისა და საზოგადოებრივი ორგანიზაციების უპრეცედენტო ერთიანობა. არის ძალიან მკაფიო და მკაცრი მოთხოვნები, რომლებიც ხელისუფლებამ აუცილებლად უნდა დააკმაყოფილოს. საკონსულტაციო შტაბში, რომელიც დიდ კარავშია განთავსებული, დღეში რამდენჯერმე ოპოზიციური პარტიები გეგმებს შეაჯერებენ“, - აცხადებს „ნაციონალური მოძრაობის“ წევრი აკაკი მინაშვილი.

ოპოზიციის წარმომადგენლები აცხადებენ, რომ მათ აქვთ კონკრეტული სამოქმედო გეგმა, რომელიც ხელისუფლებას მოთხოვნებს შეასრულებინებს. ამ გეგმას ისინი საპროტესტო აქციაზე გამოაცხადებენ.

აქციაზე „ერთად ერთის წინააღმდეგ“ დასასწრებად თბილისში სამეგრელოდან და იმერეთიდან „ნაციონალური მოძრაობის“ წარმომადგენლები და მხარდამჭერები გაემგზავრნენ. ისინი საარჩევნო სისტემაში ცვლილებებთან დაკავშირებით წარდგენილი კანონპროექტის ჩავარდნას აპროტესტებენ და გაერთიანებული ოპოზიციის მოთხოვნებს უერთდებიან.