Euroactive-ში ზალკალიანის სტატია გამოქვეყნდა

ევროპის საბჭოს მინისტრთა კომიტეტის საქართველოს თავმჯდომარეობასთან დაკავშირებით, საქართველოს საგარეო საქმეთა მინისტრმა, დავით ზალკალიანმა გამოცემა „ევროაქტივში“ (Euroactive) სტატია გამოაქვეყნა.

მინისტრის განცხადებით, ეს არის დიდი პასუხისმგებლობა და ერთგვარი გამოწვევაც, ვინაიდან საქართველო პირველად არის საერთაშორისო ორგანიზაციის თავმჯდომარე ქვეყანა.

„დღეს სიამაყით შემიძლია განვაცხადო, რომ საქართველო არამხოლოდ უძველესი ისტორიისა და ტრადიციების ქვეყანაა, არამედ წარმატებული და თანამედროვე სახელმწიფოა, რომელიც დამსახურებულ ადგილს იკავებს საერთაშორისო თანამეგობრობაში“, - აღნიშნავს მინისტრი.

საგარეო საქმეთა სამინისტროს ინფორმაციით, მინისტრი ყურადღებას ამახვილებს იმ ფაქტზე, რომ საქართველოსა და ევროპის საბჭოს 20-წლიანი წარმატებული თანამშრომლობა აკავშირებთ.

„ამ წლების განმავლობაში ევროპის საბჭოს ჩართულობით გატარდა მნიშვნელოვანი რეფორმები და განხორციელდა მრავალი პროექტი. საქართველო აქტიურად მონაწილეობს ორგანიზაციის მუშაობაში და ამავდროულად თავად ორგანიზაცია აქტიურად არის ჩართული საქართველოს წინაშე მდგარ სასიცოცხლოდ მნიშვნელოვან გამოწვევებზე საპასუხოდ“. 

ზალკალიანი აღნიშნავს, რომ საქართველოს თავმჯდომარეობა გვაძლევს შესაძლებლობას, ჩვენი წვლილი შევიტანოთ ევროპის საბჭოს ფუძემდებლური პრინციპების განმტკიცებაში; საქართველოს მიზანია, იყოს ორგანიზაციის მიერ შექმნილ ღირებულებათა სისტემის როგორც მოსარგებლე, ასევე მისი ღირსეული კონტრიბუტორი და დამცველი.

„როგორც თავმჯდომარე ქვეყანა, საქართველო ყურადღებას გაამახვილებს ისეთ პრიორიტეტზე, როგორიცაა - ადამიანის უფლებები და გარემოს დაცვა; სამოქალაქო ჩართულობა გადაწყვეტილების მიღების პროცესში; ბავშვზე ორიენტირებული მართლმსაჯულება - აღდგენითი მართლმსაჯულების ევროპული გამოცდილება; დემოკრატიის გაძლიერება განათლების, კულტურისა და ახალგაზრდობის ჩართულობით“.

მინისტრი ხაზგასმით აღნიშნავს, რომ ხსენებულ თემებზე ფოკუსირების მიზანია, უფრო მეტად მივაპყროთ ევროპის საბჭოს ყურადღება ამ საკითხებზე, რომ მოვახდინოთ მიღწეული პროგრესის ურთიერთგაზიარება და კონსოლიდაცია.

საქართველომ ევროსაბჭოს თავმჯდომარეობა ოფიციალურად 27 ნოემბერს გადაიბარა.