წულუკიანი: ხალხს „ნაცმოძრაობის“ დაბრუნება არ სურს

ოპოზიცია ვერ ახდენს საზოგადოებრივი აზრის მობილიზებას, რადგან ჰგონიათ, რომ ხალხს მათი ხელისუფლებაში დაბრუნება უნდა. ამის შესახებ იუსტიციის მინისტრმა, თეა წულუკიანმა ჟურნალისტებს განუცხადა. 

წულუკიანი „არ მიიჩნევს, რომ ოპოზიცია სამართლიანად ითხოვს რაღაცის შესრულებას“.

„ბიძინა ივანიშვილმა თქვა, რომ ეს იყო კეთილი ნება, ნულოვანი ბარიერით ჩატარებულიყო პროპორციული არჩევნები. 20 ივნისს ქუჩაში მდგარი არც ერთი ადამიანი არ ითხოვდა ნულოვან პროპორციულ არჩევნებს. ეს იყო ინიციატივა, რომელიც ჩავარდა. ახლა სახეზეა კონსტიტუცია, რომლის მიხედვით არჩევნები ჩატარდება“, - განაცხადა წულუკიანმა.

„გუშინ ითქვა, რომ კედელზე თავის დარტყმას არ აქვს აზრი. ხალხს მათი დაბრუნება ხელისუფლებაში ნამდვილად არ უნდა, ნულოვანი პროპორციული მოდელი სწორედ იმისთვის უნდოდათ, რომ ხელისუფლებაში მარტივად, უსამართლოდ დაბრუნებულიყვნენ. ნულოვანი პროპორციული მოდელი, სწორედ კოალიციური მთავრობისკენ გზა იქნებოდა. ეს პარლამენტმა არ გაიზიარა. თუ საზოგადოების წევრებს აქვთ ამასთან დაკავშირებით კითხვის ნიშანი, ეს აზრი გამოხატონ საარჩევნო ურნასთან“, - აღნიშნა იუსტიციის მინისტრმა.

პარლამენტთან ოპოზიციისა და აქტივისტების ორგანიზებული აქცია დასრულდა. ორგანიზატორების განცხადებით, სამომავლო გეგმებს მათ მხარდამჭერებს დღის განმავლობაში გააცნობენ. მანამდე პარლამენტის მიმდებარე ტერიტორიაზე აქტივისტებსა და პოლიციას შორის დაპირისპირება იყო.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.