აქტივისტებმა შსს-ს ღობეს ბოქლომი დაადეს

აქტივისტებმა შინაგან საქმეთა სამინისტროსთან რუსთაველის გამზირზე შეკრებილებისთვის შეშის წართმევის ფაქტი გააპროტესტეს. მათ უწყებასთან შეშა მიიტანეს და განაცხადეს, რომ „დროა შსს-მ დაიწყოს გამოძიება, რომ  შეშის გამოყენება ისეთი საშიში მიზნებისთვის არ მოხდეს, როგორიც ადამიანის გათბობაა”.

მანამდე აქციის მონაწილეებმა შსს-ს ღობეს სიმბოლურად ბოქლომიც დაადეს, რომელიც უწყების თანამშრომლებმა მოხსნეს. 

„ამ პერფორმანსით ჩვენ გვინდოდა, უწყებისთვის გვეჩვენებინა, რომ რასაც ისინი სჩადიან, არის უკანონობა“, - განაცხადა აქცია-პერფორმანსის ერთ-ერთმა ორგანიზატორმა, ზვიად კუპრავამ.

მანამდე, აქციის მონაწილეები პარლამენტის პიკეტირებას გეგმავდნენ.  შემდეგ კი მოძრაობა „შეცვალეს“ წევრებმა პარლამენტიდან ეროვნული ბიბლიოთეკისკენ გადაინაცვლეს, სადაც იუსტიციის მინისტრი თეა წულუკიანი იმყოფებოდა. 

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.