„ლელო“ ხელისუფლებისა და ოპოზიციის მოლაპარაკებებში „სირცხვილიას“ ჩართვას ითხოვს

მამუკა ხაზარაძის მიერ დაფუძნებული მოძრაობა „ლელო“ ხელისუფლებისა და ოპოზიციის მოლაპარაკებებში მოძრაობა „სირცხვილიას“ ჩართვას ითხოვს. როგორც „ლელოს“ განცხადებაშია აღნიშნული, სწორედ მოძრაობა „სირცხვილიას“ თანმიმდევრულმა, პრინციპულმა და სწორმა პროტესტმა შექმნა 2020 წელს არჩევნების პროპორციულად ჩატარების შესაძლებლობა.

„პროპორციული არჩევნების დაპირების უკან წაღებით ხელისუფლებამ პოლიტიკური პროცესი ჩიხში შეიყვანა. მოქალაქეების, საზოგადოებრივი ჯგუფების, პოლიტიკური პარტიების ერთიანი და პრინციპული პოზიციონირების შედეგად, დიპლომატიური კორპუსის ჩართულობით, დღეს ხელისუფლებისა და ოპოზიციური პარტიების მონაწილეობით დიალოგი დაიწყო.

აუცილებელია, მოლაპარაკებები დასრულდეს ქვეყნის ინტერესების სასარგებლოდ, რაც თითოეული ჩვენგანისთვის უნდა იყოს ყველაზე მნიშვნელოვანი მიზანი. იმედი გვაქვს, ხელისუფლება ახლა მაინც გაიაზრებს სათანადოდ მის როლს და პასუხისმგებლობას ამ პროცესში.

ამავე დროს, პრინციპულად მიგვაჩნია, რომ ამ მოლაპარაკებებში ჩაერთოს საზოგადოებრივი ორგანიზაცია "სირცხვილია", რომლის წვლილი უდიდესია პროპორციული არჩევნების დაპირების მიღწევაში მიმდინარე წლის ზაფხულში და რომელიც დღემდე ამ პროტესტის ერთ-ერთი მთავარი და უმნიშვნელოვანესი მონაწილეა. სწორედ ამ ადამიანების თანმიმდევრულმა, პრინციპულმა და სწორმა პროტესტმა შექმნა 2020 წელს არჩევნების პროპორციულად ჩატარების შესაძლებლობა.

პროპორციული არჩევნები არ არის მხოლოდ პოლიტიკური პარტიებისთვის მნიშვნელოვანი საკითხი, ეს არის თითოეული მოქალაქის უფლება, მიიღოს მონაწილეობა სამართლიან არჩევნებში. ამასთან, „სირცხვილიას“ ჩართვა ამ პროცესში გაზრდის პროცესის ანგარიშვალდებულებას ფართო საზოგადოების წინაშე, რაც აუცილებელია“, - აღნიშნულია განცხადებაში.

მანამდე ხელისუფლებისა და ოპოზიციის მოლაპარაკებებს თავად „სირცხვილიას“ ორგანიზატორებიც გამოეხმაურნენ. მათი განცხადებით, მოლაპარაკებებზე წარმოდგენილმა პოლიტიკოსებმა უნდა იმოქმედონ მკაცრად განსაზღვრული მანდატით ერთადერთი შედეგის მისაღებად - პროპორციული არჩევნების ე.წ. გერმანული მოდელით ჩატარება.

სასტუმრო „ბილტმორში“ „ქართული ოცნების“ და ოპოზიციური პარტიების წარმომადგენლების შეხვედრა მიმდინარეობს, რომელსაც საქართველოში აკრედიტირებული დიპლომატიური მისიების წარმომადგენლებიც ესწრებიან. მხარეები მიმდინარე პოლიტიკური საკითხებს განიხილავენ. 

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.