ინაშვილი: ჩვენ ვართ მთავარი ოპოზიციური ძალა

„პატრიოტთა ალიანსმა“ სპორტის სასახლეში აქცია გამართა. პარტიის ლიდერების თქმით, დახურული სივრცე იმ მიზნით აირჩიეს, რომ ასე უფრო ნათლად გამოჩნდებოდა მათი მხარდამჭერების რაოდენობა.

„პატრიოტთა ალიანსის“ წევრებმა მხარდამჭერებს სიტყვით მიმართეს და აღნიშნეს, რომ პარლამენტის ბოიკოტისა და აქციების რეჟიმს ინარჩუნებენ.

მოთხოვნა უცვლელია - ჩატარდეს მომავალი არჩევნები სრულად პროპორციული სისტემით. წინა ხელისუფლების მაღალჩინოსნების დასჯას ისევ ითხოვენ. აქცია ამ დროისთვის უკვე დასრულებულია, თუმცა როგორც ირმა ინაშვილი აცხადებს, პარტიის მიერ ორგანიზებული პროტესტი პერმანენტულ ხასიათს მიიღებს იმ შემთხვევაში, თუ ხელისუფლების წარმომადგენლები დათმობაზე არ წავლენ.

„დღესაც იყო შეხვედრა ელჩებთან, დილიდან ვიყავით შეკრებილი. ჩემი მთავარი მოთხოვნა არის, არავითარი სავარძლები, არავითარი თანამდებობები, არავითარი გაყოფა მინისტრთა კაბინეტის და კოალიციები და ა.შ.

ჩემი მთავარი მიზანია, რომ ბოლოს და ბოლოს ჩვენ ვიყოთ ის მთავარი ძალა, რომელიც სინამდვილეში ნამდვილად ვართ. ჩვენ ვართ მთავარი ოპოზიცია ქვეყანაში. ეს არის სიმართლე.

რა გვესმის შვიდი წლის განმავლობაში - ვერ მივაღწიეთ იმას, რომ „ქართულმა ოცნებამ“ შეასრულოს მისი ერთი მთავარი დაპირება - დამნაშავეების დასჯა.

ეს დამნაშავეები რომ არ დასაჯეს, იმიტომ ხდება ყველაფერი, რასაც ვხედავთ - ამდენი უკიდეგანო უსამართლობა. დღევანდელ შეკრებაზე მარტო რეზოლუციის მიღებას აღარ ვითხოვთ, პირდაპირ ვითხოვთ, დასაჯეთ დამნაშავეები, სააკაშვილები და ბოკერიები“, - განაცხადა ირმა ინაშვილმა.

დიპლომატიური კორპუსის ინიციატივით, „ქართული ოცნების“ და ოპოზიციურ პარტიებს შორის სასტუმრო „ბილტმორში“ გამართულ ექვსსაათიან შეხვედრაზე მთავარი განსახილველი საკითხი ე.წ. გერმანული მოდელი იყო. 

ხელისუფლების წარმომადგენლებმა შეხვედრის შემდეგ თქვეს, რომ გერმანული საარჩევნო მოდელი ანტიკონსტიტუციურია და ამ საკითხზე მომავალში დებატები ვეღარ გაიმართება, თუმცა პოლიტიკური კონსულტაციებისთვის ისევ მზად არიან. 

ოპოზიციის წარმომადგენლები ამბობენ, რომ ხელისუფლებამ ე.წ. გერმანული მოდელის კონსტიტუციურობის დადგენაში საერთაშორისო ორგანიზაციების ჩართვაზე უარი თქვა და ისინი აქციებს განაგრძობენ.

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.