ბურჯანაძის პარტია მოსკოვში ბოდიშის მოხდას უარყოფს

„დემოკრატიული მოძრაობის“ ლიდერმა ნინო ბურჯანაძემ ზაფხულში, მართლმადიდებლობის საპარლამენტთაშორისო ასამბლეის მუშაობის დროს მომხდარი ანტირუსული სკანდალის გამო ბოდიში მოიხადა. ინფორმაციას ამის შესახებ რუსული მედია ავრცელებს.

„ამ ამაზრზენი ინციდენტის გამო ბოდიშის მოხდის არ მეშინია. შეგაწყვეტინეთ, მაგრამ მინდა ბოდიში მოვიხადო, ვინაიდან ეს, პირველ რიგში, ქართველი ხალხის და საქართველოს შეურაცხყოფა იყო“, - განაცხადა ბურჯანაძემ, რუსეთის ფედერაციის საბჭოს საერთაშორისო საკითხთა კომიტეტის ხელმძღვანელ კონსტანტინ კოსაჩოვთან შეხვედრაზე.

კოსაჩოვმა, თავის მხრივ, ბურჯანაძეს ამ სიტყვებისთვის მადლობა გადაუხადა და განაცხადა, რომ რუსეთ-საქართველოს შორის ავიამიმოსვლის აღდგენის და სავიზო რეჟიმის გამარტივებისა და შემდგომი გაუქმების საკითხები სასწრაფოდ უნდა მოგვარდეს.

„დემოკრატიულ მოძრაობაში“ ბოდიშის მოხდის ფაქტს კატეგორიულად უარყოფენ და აცხადებენ, რომ რუსულ მედიაში გამოქვეყნებული ინფორმაცია სიცრუეა.

„ნინო ბურჯანაძე ამბობს, რომ მსგავსი რამ არ ყოფილა, არანაირი ბოდიში მას არ მოუხდია, ვინაიდან არ თვლის, რომ გავრილოვთან დაკავშირებით რამე საბოდიშო ჰქონდა. პარტიის ლიდერის თქმით, ერთადერთი, რაც მან გავრილოვთან დაკავშირებით თქვა, იყო ის, რომ მან მომხდარს სამწუხარო ფაქტი უწოდა. ნინო ბურჯანაძეს არაერთხელ უთქვამს ქართულ მედიასთან, რომ გავრილოვი პარლამენტის თავმჯდომარის სკამში თავისი ნებით არ ჩამჯდარა. ეს გაიმეორა მან კოსაჩოვთან შეხვედრაზეც“, - აცხადებენ პარტიაში.

ნინო ბურჯანაძე მოსკოვში შვილთან, ანზორთან ერთად 3 დეკემბერს გაემგზავრა. 5 დეკემბერს ბურჯანაძე რუსეთის საგარეო საქმეთა მინისტრის მოადგილე ანდრეი რუდენკოს შეხვდა. 

20 ივნისს საქართველოს პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა.