გრიგოლ ვაშაძე: ოპტიმისტური მოლოდინი არ მაქვს

ხელისუფლებისა და ოპოზიციის წარმომადგენლების მორიგი შეხვედრა სასტუმრო „შერატონში“, იმართება. შეხვედრის დაწყებამდე გრიგოლ ვაშაძემ განაცხადა, რომ ოპტიმისტური მოლოდინი არ აქვს. 

„მოლოდინის რეჟიმში ვართ, როდის ამოეწურებათ მოთმინება და დათანხმდებიან რაიმე კონსტრუქციულზე - უფრო იმის მოლოდინი მაქვს, რომ მოიტანენ რაღაც აბსოლუტურად მიუღებელს, რომელიც შეურაცხყოფის ან დაცინვის ზღვარზე იქნება“, - განაცხადა ვაშაძემ. 

„ახალი საქართველოს“ ლიდერის გიორგი ვაშაძის თქმით კი, განსაკუთრებული მოლოდინი ვერ ექნებათ, რადგან მიჩვეული არიან ხელისუფლებისგან მოტყუებას. ოპოზიციონერი ლიდერის თქმით, მათ მიერ შემუშავებულ მოდელთან დაკავშირებით ეუთოს დასკვნას ელოდებიან.  

დიპლომატიური კორპუსის ჩართულობით 8 დეკემბერს გამართულ მეორე რაუნდზე მმართველი გუნდი და ოპოზიცია მრავალმანდატიანი მაჟორიტარული სისტემის განხილვაზე შეთანხმდნენ. ახალ ინიციატივაზე მხარეები სწორედ ხვალ დაგეგმილ შეხვედრაზე იმსჯელებენ. მანამდე კი საერთაშორისო ორგანიზაციების მიერ შეთავაზებულ ამ წინადადებას გუნდში განიხილავდნენ. 

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. 

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.