ილია ელოშვილი: ხანდოსხევის მოსახლეობას მშენებლობის გაჩერების უფლება არ აქვს

დუშეთში, სოფელ​ ხანდოსხევში მიმდინარე აქციაზე, დუშეთის მუნიციპალიტეტის გამგებლის, ვაჟა ჩოხელის გამოჩენას ხმაური მოყვა. ინფორმაციას 1tv.ge ავრცელებს.

აქციის მონაწილეებმა ვაჟა ჩოხელი საკითხის მიმართ გულგრილობაში დაადანაშაულეს და განაცხადეს, რომ მან მიაწოდა ინფორმაცია სამინისტროს, თითქოს მოსახლეობა ელექტრომაგისტრალის მშენებლობაზე თანახმა იყო.

კამათი ფიზიკურ დაპირისპირებაში გადაიზარდა. მუნიციპალიტეტის გამგებელი აცხადებს, რომ პროექტთან დაკავშირებით მოსახლეობას ინფორმაცია წინასწარ, რამდენჯერმე გამართულ შეხვედრაზე მიაწოდეს. აქციის მონაწილეები დაშლას არ აპირებენ, მათი თქმით, მძიმე ტექნიკას მუშაობის გაგრძელების საშუალებას არ მისცემენ.

აქციასთან დაკავშირებით კომენტარი გააკეთა საქართველოს ენერგეტიკის მინისტრის მოადგილემ ილია ელოშვილმა. 

"შეხვედრილი ვარ მათთან ოფისში, ასევე მათთან ვარ ჩასული. აქ არის ორი მომენტი, პირველი - ვინც ეწინააღმდეგება ზოგადად ხაზის მშენებლობას მინდა, ვუთხრა მათ, რომ არანაირი ხაზი არ გადადის სახლის სახურავებზე. დაშორებულია 100-150 მეტრით სახლებიდან. არანაირი უფლება არ აქვთ მათ, რომ გააჩერონ მშენებლობა", - განაცხადა ელოშვილმა.

მისი თქმით, იქ არიან არასამთავრობოები, რომლებიც მუდმივად ეწინააღმდეგებიან ენერგეტიკის სამინისტროს ყველა წამოწყებას, "იქნება ეს პატარა ჰესი, დიდი ჰესი თუ რამე ხაზის გაყვანა".

მოსახლეობა კომპანია "ელექტროტრანსის" ტექნიკას მუშაობის და გადაადგილების საშუალებას არ აძლევს. მათ ახლად გაყვანილი გზა აქვთ გადაკეტილი, რომელსაც კომპანია მთის ფერდობზე მაღალი ძაბვის ელექტოგადამცემი ხაზის სამშენებლო სამუშაოებისთვის ჭრის. 

ადგილზე სამართალდამცველები არიან მობილიზებული. ადგილობრივების აქციას გარემოსდაცვითი ორგანიზაციებიც შეუერთდნენ.  მოსახლეობა აცხადებს, რომ ტერიტორია მეწყერსაშიშია და სამუშაოები, რომელიც ენერგეტიკის სამინისტროს დაკვეთით სრულდება სოფლებს განადგურების საშიშროებას უქმნის, ასევე ნადგურდება ხეები და იმატებს სხვადასხვა დაავადები გავრცელების საფრთხე. სამუშაოების შეჩერების მოთხოვნით ისინი აქციებს პერმანენტულად მართავენ. კომპანიის ხელმძღვანელები ადგილზე ჯერ არ გამოჩენილან.