უზენაესის მოსამართლეების დანიშვნასთან დაკავშირებით ეუთომ ანგარიში გამოაქვეყნა

ეუთომ უზენაესი სასამართლოს მოსამართლეების დანიშვნასთან დაკავშირებით დასკვნა გამოაქვეყნა, რომელიც ორგანიზაციამ პროცესზე დაკვირვების შემდეგ მოამზადა. მოხსენებაში ხაზგასმულია საქართველოს მიერ გატარებული რეფორმის მნიშვნელობა, თუმცა ანგარიში ნაკლოვანებებზეც მიუთითებს.

„მაშინ, როდესაც უზენაესი სასამართლოს მოსამართლეების დანიშვნასთან დაკავშირებული რეფორმები სასამართლოს დამოუკიდებლობის გაუმჯობესებისთვის მნიშვნელოვანი ნაბიჯია, ისინი ვერ უზრუნველყოფენ მიუკერძოებელ პროცესს, რომელიც ეფუძნება მკაფიოდ განსაზღვრულ, ობიექტურ კრიტერიუმებს პოლიტიკური გავლენის გარეშე, ნათქვამია ეუთოს (ODIHR) დემოკრატიული და ადამიანის უფლებათა ინსტიტუტის ანგარიშში, რომელიც 9 იანვარს ორგანიზაციის ვებგვერდზე გავრცელდა. 

მასში ასევე აღნიშნულია, რომ მოსამართლეების დანიშვნასთან დაკავშირებული საბოლოო კენჭისყრა პოლიტიკური კრიზისის, ოპოზიციის ბოიკოტის და პროცესის გადადების მოწოდების ფონზე ჩატარდა. 

„საქართველოს პოლიტიკური განვითარების კრიტიკულ პერიოდში, მოსამართლეების დანიშვნასთან დაკავშირებით დამოუკიდებელი შეფასება გვთხოვეს. ჩვენ აღმოვაჩინეთ ბევრი ნაკლოვანება, რომელსაც იმედი მაქვს, რომ საქართველოს ხელისუფლება უახლოეს მომავალში გაითვალისწინებს. ჩვენი რეკომენდაციების მიზანია, წვლილი შევიტანოთ მოსამართლეების დანიშვნის სამართლებრივი ჩარჩოს გაუმჯობესებაში“, - ამბობს ODIHR-ის დირექტორი ინგიბიორგ გისლადოტირი. 

მოხსენებაში ასევე წერია, რომ პოზიტიური ასპექტების მიუხედავად, საერთო შეფასებით, მოსამართლეთა შერჩევის პროცესის დროს ვერც იუსტიციის უმაღლესმა საბჭომ და ვერც პარლამენტმა მიიღეს საკმარისი ზომები ობიექტურობის, სამართლიანობისა და თანმიმდევრულობის უზრუნველსაყოფად. 

რაც შეეხება დადებით მხარეებს, ანგარიში იტყობინება, რომ მოსამართლეების მოსმენის პროცესი ღია და გამჭვირვალე იყო, რაც კანდიდატების და მთლიანად პროცესის საზოგადოებრივი განხილვის შესაძლებლობას იძლეოდა.

ამასთან, დადებით კონტექსტშია ის ფაქტი, სამოქალაქო საზოგადოების, ომბუდსმენის ოფისის და სხვა ძირითადი ორგანიზაციების ჩართულობამ მოსმენების ღიაობასა და ხარისხზე დადებითად იმოქმედეს.   

ეუთოს მონიტორინგის ჯგუფმა პროცესის დაკვირვება 2019 წლის ივნისში დაიწყო. ჯგუფი პარლამენტის მიერ კენჭისყრის პროცესსაც აკვირდებოდა. 

პარლამენტმა უზენაესის მოსამართლედ 14 კანდიდატი 12 დეკემბერს დაამტკიცა. მოგვიანებით მათ საკანონმდებლო ორგანოში ფიცი დადეს.