ციხელაშვილი ოკუპირებულ აფხაზეთზე: როდესაც რუსეთს აქვს ექსკლუზიური გავლენა, დახმარება საკმაოდ რთულია

„პოლიტიკური პროცესების არანაირ ლეგიტიმაციაზე საუბარი არ და ვერ იქნება, - განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა ოკუპირებული აფხაზეთის ტერიტორიაზე განვითარებული მოვლენების შეფასებისას.

ციხელაშვილმა აღნიშნა, რომ ოკუპაციის პირობებში, როდესაც რუსეთს აქვს ექსკლუზიური გავლენა, დახმარების გაწევა საკმაოდ რთულია.

მინისტრის შეფასებით, ოკუპირებულ აფხაზეთში ვითარება საკმაოდ მძიმეა და ყველაზე მნიშვნელოვანია, რომ პროცესები წავიდეს მშვიდობიანად, ეს არის უმთავრესი.

„თავისთავად, განვითარებები არის საინტერესო. მათ შორის, თუნდაც სამშვიდობო პროცესის ჭრილში. ჩვენი პოლიტიკა არის უცვლელი, კურსი არის ურყევი. ჩვენ ჩართულობის, შერიგების პოლიტიკის ხაზით მივდივართ. ჩვენი პოლიტიკა არის ცალსახად მშვიდობიანი. გათვლილია მოსახლეობის დახმარებაზე. ზოგადად, ვითარება რა თქმა უნდა, ძალიან მძიმეა და ამას არც თვითონ ადგილობრივი მოსახლეობა არ უარყოფს. მათ შორის სოციალური, ეკონომიკური, ჰუმანიტარული, ადამიანის უფლებების, კრიმინოგენული, თუ ნარკოდამოკიდებულებისა და ჯანდაცვის მიმართულებით. ჩვენთვის, რა თქმა უნდა, ეს ყველაფერი ცნობილია და ამოცანა ის გახლავთ რომ, ვცადოთ მეტად დავეხმაროთ მოსახლეობას“, - განუცხადა ციხელაშვილმა ჟურნალისტებს.

10 იანვარს მედიაში გავრცელდა ინფორმაცია, რომ აფხაზმა აქტივისტებმა, რომლებიც 9 იანვარს სოხუმში, დე ფაქტო პრეზიდენტის ადმინისტრაციის შენობაში შეიჭრნენ, ცეცხლსასროლი იარაღი მოიპარეს. ინფორმაციას ამის შესახებ რუსული მედია ავრცელებს. 

ვითარება სოხუმში მას შემდეგ დაიძაბა, რაც არჩევნების შედეგებით უკმაყოფილო ოპოზიციამ ადმინისტრაციის შენობაზე შტურმი მიიტანა. დე ფაქტო პრეზიდენტთან მოსალაპარაკებლად მისულ ე.წ. დეპუტატებს კი ხაჯიმბამ განუცხადა, რომ თანამდებობიდან წასვლისთვის მზად არ არის. მოგვიანებით ე.წ. პარლამენტმა ხაჯიმბას ნებაყოფლობით გადადგომისკენ მოუწოდა, ხაჯიმბამ კი ოპოზიციას ყველა საკითხის განხილვა მოლაპარაკებათა მაგიდასთან შესთავაზა.

მანამდე რაულ ხაჯიმბამ ოკუპირებული აფხაზეთის მცხოვრებლებს სიმშვიდისკენ მოუწოდა და განაცხადა, რომ საჭიროების შემთხვევაში საგანგებო მდგომარეობას გამოაცხადებს.

ოკუპირებულ აფხაზეთში ე.წ. საპრეზიდენტო არჩევნები ორ ტურად ჩატარდა. მეორე ტურში მოქმედმა დე ფაქტო პრეზიდენტმა, რაულ ხაჯიმბამ გაიმარჯვა. მან ამომრჩეველთა ხმების 47.38% მიიღო, ალხას კვიცინიამ კი 46.19%.