ოხანაშვილი ბაკურიანის ინციდენტზე: ეს ადამიანი პოლიტიკურ ანგარიშსწორებას ცდილობდა

პარლამენტის იურიდიულ საკითხთა კომიტეტის თავმჯდომარე ანრი ოხანაშვილმა ბაკურიანში მომხდარი ინციდენტის დეტალებზე მედიასთან ილაპარაკა. მისი თქმით, სამართალდამცველების მიერ დაკავებული ადამიანი, ძალიან აგრესიული იყო და შეურაცხმყოფელი სიტყვებით საუბრობდა ოხანაშვილის ოჯახის წევრების მიმართ.

დეპუტატის განცხადებით, ის მეუღლესთან და სამ მცირეწლოვან შვილთან ერთად ორი დღით ბაკურიანში იმყოფებოდა:

„ბავშვების თხილამურებზე სრიალის შემდეგ, იქვე კაფეში შევედით, სადაც საზოგადოებრივი თავშეყრის ადგილია და ყველა შედის. ჩემმა მეუღლემ შენიშნა ადამიანი, რომელიც გვაკვირდებოდა განსაკუთრებით აგრესიული მზერით ჩემს მიმართ. ჩემს მეუღლეს ვთხოვე, ყურადღება არ მიექცია. როგორც ჩანს, ეს ადამიანი დაჟინებული მზერით გვაკვირდებოდა, ჩვენი მაგიდის ირგვლივ ტრიალებდა. შემდგომ გარეთ გასვლა დაიწყო, თუმცა რამდენიმე წუთში ისევ დაბრუნდა. დაბრუნებისთანავე კვლავ დაჟინებული მზერით ყურების შემდეგ დაჯდა გვერდით მაგიდასთან და ძალიან ბინძური სიტყვებით ხმამაღლა საუბარი დაიწყო, შეურაცხმყოფელი სიტყვებით საუბარი პირადად ჩემი და ჩემი პოლიტიკური საქმიანობის გამო, ჩემი ოჯახის წევრების, ბავშვების მიმართ. რა თქმა უნდა,იყო მუქარა ბავშვებთან დაკავშირებით“, – განაცხადა ოხანაშვილმა.

დეპუტატის თქმით, ამ ვითარებაში ის შეეცადა, შვილები და მეუღლე სიტუაციას გაერიდებინა: 

„ყველაფერი გავაკეთე, რათა არ შევსულიყავი ამ ადამიანთან რამე ფიზიკურ შემხებლობაში ან დაპირისპირებაში, პირველი იყო, რომ ბავშვები სიტუაციას გამერიდებინა. ეს გავაკეთე. ხალხის ნაწილი გარბოდა, რადგან ეს ადამიანი ძალიან აგრესიული იყო. ის იგინებოდა, ილანძღებოდა და ხალხის ნაწილმა მისი შეჩერება სცადა, ვინაიდან კაფეს მუშაობა პარალიზებული გახდა, ეს ფაქტი აღიკვეთა. ეს პიროვნება დაკავებულია. ჩემი ინფორმაციით, დაკავებულია ადმინისტრაციული სამართალდარღვევისთვის, პოლიციის წინააღმდეგ მუქარისთვის და არა ამ კონკრეტულ საქმესთან დაკავშირებით“, – განაცხადა ანრი ოხანაშვილმა.

დეპუტატის განცხადებით, მან  სამართალდამცველებს ჩვენება უკვე მისცა.

„გამოვიკითხე, მივეცი ჩვენება მეც და ჩემი ოჯახის წევრმაც, ჩემმა მეუღლემ. ამ საკითხს სამართლებრივად ვუყურებ. ჩემი თმენის ვალდებულება მეტის უფლებას არ მაძლევს, რომ პოლიტიკურ შეფასებაში შევიდე. ფაქტია, რომ ეს ადამიანი ჩემთან მიმართებაში პოლიტიკურ ანგარიშსწორებას ცდილობდა“, – განაცხადა ანრი ოხანაშვილმა.

დეპუტატ ანრი ოხანაშვილის მიმართ შეურცხმყოფელი ქმედების გამო დაკავებულ ვახტანგ რობაქიძეს ადმინისტრაციული სამართლადარღვევისთვის 3-დღიანი პატიმრობა შეეფარდა.

შემთხვევა ბაკურიანის ერთ-ერთ რესტორანში 14 იანვარს მოხდა.