ქეთევან ციხელაშვილი: ერგნეთის შეხვედრების აღდგენით ქართული მხარე დაინტერესებულია

შერიგებისა და სამოქალაქო თანასწორობის საკითხებში საქართველოს სახელმწიფო მინისტრის ქეთევან ციხელაშვილის განცხადებით, ქართულ მხარეს არ გაუწყვეტია ინციდენტების პრევენციისა და მათზე რეაგირების მექანიზმზე შეხვედრები. მისი თქმით, ქართული მხარე დაინტერესებულია ამ შეხვედრების აღდგენით. ამის შესახებ მინისტრმა ბრიუსელში, ევროპარლამენტის საგარეო ურთიერთობათა კომიტეტის სხდომის ფარგლებში განაცხადა.

მინისტრის თქმით, საქართველოს სჭირდება პარტნიორების დახმარება ჟენევის დისკუსიების ფარგლებში და მის მიღმა, რათა საოკუპაციო ძალების მხრიდან "შემაშფოთებელი მოქმედებები" შეჩერდეს. 

"საუბარია ძალიან შემაშფოთებელ მოქმედებებზე, რომლებსაც ადგილი აქვთ ბოლო თვეების განმავლობაში. ეს ეხება ბორდერიზაციას და ასევე ფაქტობრივად მოსახლეობის მძევლად აყვანის არალეგიტიმური მიზნების მისაღაწევად. ეს არის ძალიან გამომწვევი და ძალიან პროვოკაციული ნაბიჯები. ჩვენ გვჭირდება ჩვენი პარტნიორების დახმარება ჟენევის დისკუსიების ფარგლებში და მის მიღმა. დახმარება საჭიროა იმისათვის, რომ ეს მოქმედებები შეკავდეს. მე ვახსენე ვაჟა გაფრინდაშვილის შემთხვევა. ის თითქმის 50 დღის განმავლობაში ჰყავდათ დაკავებული. პარტნიორების მხარდაჭერა და ზეწოლა იყო ძალიან მნიშვნელოვანი იმისათვის, რომ ეს შემთხვევა მშვიდობიანად დასრულებულიყო.

ყველამ ძალიან კარგად იცის, რომ ამ წლების განმავლობაში ასობით ადამიანზე ვსაუბრობთ, მათი დაკავება უკანონოდ მოხდა. საუბარია 6-ჯერ მეტ ადამიანზე ოკუპირებული ტერიტორიებიდან. ეს ნიშნავს, რომ ეს პოლიტიკა არის ოსების, აფხაზების წინააღმდეგ მიმართული, ქართველების წინააღმდეგ მიმართული. არ აინტერესებთ ეთნიკური წარმომავლობა, გამყოფი ხაზის რომელ მხარეს ცხოვრობენ ეს ადამიანები, მათი სასიცოცხლო საჭიროებები და დროა გადავდგათ ნაბიჯები. დიალოგი და შერიგება საზოგადოებებს შორის არის აუცილებელი, რათა დეოკუპაციის ამოცანებთან ერთად მდგრად მშვიდობას მივაღწიოთ", - განაცხადა ქეთევან ციხელაშვილმა. 

საქართველოს საპარლამენტო ასოცირების საბჭოს თავმდჯომარის, ესტონეთის ყოფილი საგარეო საქმეთა მინისტრის მარინა კალიურადის განცხადებით კი ევროსაბჭოში რუსეთის დაბრუნების მიუხედავად, რუსეთის ხელისუფლებისგან და სეპარატისტების მხრიდან პროვოკაციები გრძელდება.

"ჩვენ ვხედავთ, რომ რუსეთი არღვევს და არ ასრულებს ვალდებულებებს, რაც მოსკოვს 2008 წელს ხელმოწერილი შეთანხმებით დაეკისრა. მცოცავი ოკუპაცია, სამხედრო სწავლებები, მილიტარიზაცია, პროპაგანდა, ბორდერიზაცია - ეს ყველაფერი წარმოადგენს საფრთხეს მთელი რეგიონისათვის. დაკეტილია გადასავლელი გზები, შეზღუდულია გადაადგილების თავისუფლება ,გაყოფილია საზოგადოება, რომელიც ჰარმოანიაში ცხოვრობდა. მოხდა გასულ წელს ევროკავშირის მისიის მონიტორების დაკავება. იმ მისიის წარმომადგენლების, რომლებსაც უმნიშვნელოვანესი მისია აკისრიათ. ადამიანის უფლებების კუთხით არსებული ვითარება საგანგაშოა ორივე ოკუპირებულ ტერიტორიაზე. ხალხი იღუპება, ვინაიდან მათ შეზღუდული აქვთ გადაადგილების თავისუფლება და ვერ იღებენ სათანადო სამედიცინო მომსახურებას", - განაცხადა მარინა კალიურადმა.

მისი თქმით, ყველა მიესალმება ვაჟა გაფრინდაშვილის გათავისუფლებას, მაგრამ "ჩვენ არ უნდა დაგვავიწყდეს, რომ ათობით ადამიანს უკანონოდ აკავებენ და აჯარიმებენ, მათ უკანონოდ აკავებენ იმის გამო, რომ არარსებული საზღვარი გადაკვეთეს. ჩვენ ასევე მონიტორიგს ვუწევთ ოკუპირებულ აფხაზეთში მიმდინარე მოვლენებს, სადაც ე.წ. საპრეზიდენტო არჩევნები ჩატარდა. ე.წ. პრეზიდენტი გადადგა. ოკუპირებულ აფხაზეთში არასტაბილური ვითარებაა და ჩვენ უნდა ვიყოთ მუდმივად ყურადღებით. ჩვენ ყველა შესაძლებლობა უნდა გამოვიყენოთ საქართველოს მიმართ მხარდაჭერის დასაფიქსირებლად, საქართველოს ტერიტორიული მთლიანობის და სუვერენიტეტის მხარდასაჭერად. ვაგრძელებთ არაღიარების პოლიტიკას და ასევე მხარი დავუჭიროთ საქართველოს ხელისუფლების ინიციატივებს მშვიდობიანი გზებით კონფლიქტის მოგვარების თაობაზე", - განაცხადა კალიურადმა.