ევროპის საბჭოს გენმდივანმა საქართველოს მიერ არჩეული პრიორიტეტები შეაქო

სტრასბურგში გამართულ ღონისძიებაზე ევროპის საბჭოში გენერალურმა მდივანმა და ორგანიზაციის წევრებმა საქართველოს თავმჯდომარეობის ერთ-ერთ პრიორიტეტად ახალგაზრდობის საკითხის შერჩევას მაღალი შეფასება მისცეს.

საგარეო საქმეთა სამინისტროს ინფორმაციით, საქართველოს თავმჯდომარეობის ფარგლებში მინისტრთა მოადგილეების არაფორმალური შეხვედრა გაიმართა, რომლის თემაც იყო - „ახალგაზრდობის ჩართულობით დემოკრატიის გაძლიერება ევროპის საბჭოსა და მის წევრ ქვეყნებში“.

ღონისძიება ევროპის საბჭოში საქართველოს მუდმივმა წარმომადგენელმა, მინისტრთა მოადგილეების კომიტეტის თავმჯდომარემ, ირაკლი გივიაშვილმა გახსნა.

საკუთარ გამოსვლაში მან ხაზი გაუსვა ახალგაზრდობის საკითხების პრიორიტეტულობას ევროპის საბჭოსთვის და აღნიშნა, რომ  ორგანიზაცია ამ კუთხით ორი მიმართულებით მუშაობს - ხელი შეუწყოს ახალგაზრდების მონაწილეობას გადაწყვეტილების მიღების პროცესში და გაიზარდოს ახალგაზრდების აქტიურობის შესახებ ცნობადობა.

დამსწრეებს სიტყვით მიმართა ევროპის საბჭოს გენერალურმა მდივანმა, მარია პეიჩინოვიჩ ბურიჩმა. გენერალური მდივანი მიესალმა, რომ საქართველოს თავმჯდომარეობამ თავის პრიორიტეტად შეარჩია ახალგაზრდობის თემატიკა. გენერალური მდივნის მოსაზრებით, მნიშვნელოვანია, ახალგაზრდებს ჰქონდეთ შესაძლებლობა, მონაწილეობა მიიღონ სამი ძირითადი ღირებულების - ადამიანის უფლებების, სამართლის უზენაესობისა და დემოკრატიის განმტკიცებაში.

გენერალურმა მდივანმა ასევე ისაუბრა ახალგაზრდებისთვის განათლების უფლებისა და სოციალური უფლებების მიღების შესაძლებლობის შექმნაზე. ამ კუთხით ბურიჩი მიესალმა ახალგაზრდობის სექტორში 2030 წლის სტრატეგიის მიღებას და განაცხადა, რომ სტრატეგიის ძირითადი მიზანია, შექმნას ისეთი მექანიზმები, რომელიც ახალგაზრდების წინაშე დღეს არსებულ გამოწვევებს უპასუხებს.

შეხვედრის მონაწილეებს ევროპის საბჭოს მინისტრთა მოადგილეების კომიტეტს სიტყვით მიმართა საქართველოს ახალგაზრდობის სააგენტოს ხელმძღვანელმა, რევაზ ჩარკვიანმა. ახალგაზრდობის სააგენტოს ხელმძღვანელმა ისაუბრა ეროვნულ დონეზე ახალგაზრდების მონაწილეობისა და ჩართულობის მნიშვნელობაზე და ამ პროცესში სააგენტოს როლზე. მან ისაუბრა იმ რეფორმებზე, რომელიც ახალგაზრდობის სექტორში გატარდა და მოახდინა ამ მიმართულებით სამთავრობო უწყებების ფუნქციების გაერთიანება.

მისი თქმით, სწორედ ქვეყნის პოლიტიკურ ცხოვრებაში ახალგაზრდობის ჩართულობით არის შესაძლებელი თანამედროვე, დემოკრატიული სახელმწიფოს შექმნა.

შეხვედრის ფარგლებში პრეზენტაციები წარადგინეს ევროპის საბჭოს ახალგაზრდობის საკითხებზე მრჩეველთა საბჭოსა და ახალგაზრდობის ერთობლივი საბჭოს თავმჯდომარემ, ანია ოლინ პაპმა, ევროპის ახალგაზრდული ფორუმის ვიცეპრეზიდენტმა, ვილი მაიამამ და ევროპის საბჭოს ადგილობრივ და რეგიონულ ხელისუფლებათა კონგრესში ახალგაზრდა დელეგატების ყოფილმა წარმომადგენელმა და SAY (მდგრადობა და ადვოკატირება ახალგაზრდების მიერ) დამფუძნებელმა, ნილს დე ფრაგიემ.

გამომსვლელებმა ისაუბრეს ახალგაზრდების საზოგადოებრივ საქმიანობაში აქტიურ მონაწილეობაზე. შეხვედრაზე გაიმართა აქტიური დისკუსია, რომელშიც მონაწილეობდნენ ევროპის საბჭოს წევრი ქვეყნების მუდმივი წარმომადგენლები. დელეგაციებიევროპის საბჭოს მინისტრთა კომიტეტის თავმჯდომარეობის პრიორიტეტად საქართველოს მიერ ახალგაზრდობის საკითხის განსაზღვრას მიესალმნენ. შეხვედრის დასრულების შემდეგ  ევროპის საბჭოს ახალგაზრდობის სექტორის 2030 წლის სტრატეგიის ოფიციალური პრეზენტაცია და მიღება გაიმართა.