ბექა ნაცვლიშვილმა კომპანია „ფრონტერაზე“ ამერიკელ პოლიტიკოსებსა და ელჩს წერილი გაუგზავნა

საქართველოს პარლამენტის დამოუკიდებელი დეპუტატი ბექა ნაცვლიშვილი ამერიკის შეერთებული შტატების წარმომადგენელთა პალატისა და სენატის წევრებს, ასევე ამერიკის შეერთებული შტატების ელჩს საქართველოში, კელი დეგნანს წერილით მიმართავს. წერილში საუბარია კონგრესმენების წერილსა და კომპანია „ფრონტერაზე“, რომლის საქმიანობის დაცვასაც კონგრესმენები წერილში ეხმაურებიან.

ბექა ნაცვლიშვილის განცხადებით, ის მიესალმება საქართველოში უცხოურ ინვესტიციებს, თუმცა მოითხოვს, რომ „როგორც უცხოური, ისე ადგილობრივი კომპანიების ნებისმიერი ტიპის ბიზნეს აქტივობამ, თანაბარი სარგებელი მოუტანოს დასაქმებულსაც და ბიზნესსაც“.

„არ შეიძლება, ბიზნესი ვითარდებოდეს ქართველი ხალხის, ჩვენი მშრომელი მოქალაქეების ექსპლუატაციის ხარჯზე.
მე საპარლამენტო უმრავლესობა ერთი წლის წინ დავტოვე. ჩემი გადაწყვეტილება გაამყარა უზანაესი სასამართლოს მოსამაართლეების არჩევის ირგვლივ მიმდინარე პროცესებმა. ვაფასებ შეერთებული შტატების ურყევ მხარდაჭერას რუსეთის მიერ საქართველოს ტერიტორიების ოკუპაციის წინააღმდეგ და მის ძალისხმევას საქართველოში დემოკრატიული ინსტიტუტების განვითარების მიმართულებით. ასევე, ვიზიარებ ქართული ოცნების მიმართ თქვენს კრიტიკას, რაც დაპირებულ პროპორციულ საარჩევნო სისტემაზე უარის თქმასა და საპროტესტო აქციებზე არაპროპორციული ძალის გამოყენებას მოჰყვა. მაგრამ, კომპანიების ბიზნეს აქტივობა სულ სხვა საკითხია, განსაკუთრებით კი კომპანია „ფრონტერას“ ბოლოდროინდელი საქმიანობა. დემოკრატიული პროცესებისა და კანონის უზენაესობის მხარდაჭერის პარალელურად, თქვენი მხრიდან, ისეთი კომპანიის დაცვა როგორიც „ფრონტერაა“, ყველაფერს ჩრდილს აყენებს“, - წერს ბექა ნაცვლიშვილი წერილში.

დამოუკიდებელი დეპუტატის განცხადებით, კომპანია „ფრონტერამ“ თავისი ვალდებულება არ შეასრულა და ბოლო ორი წლის განმავლობაში თვეობით არ უხდიდა დასაქმებულებს ხელფასს. 

„როდესაც დასაქმებულებმა ეს მდგომარეობა გააპროტესტეს, 2019 წლის დეკემბერში, წინასაახალწლოდ, ისინი დათხოვნილ იქნენ სამსახურიდან. მათ დღემდე არ აუღიათ კუთვნილი ხელფასი.
ამერიკელი კონგრესმენები, რომლებმაც არაერთხელ დაუდასტურეს ქართველ ხალხს გვერდში დგომა და პატივისცემა, ბრმად არ უნდა იცავდნენ მათი ქვეყნის ბიზნესკომპანიების ინტერესებს. პირიქით, ისინი საქართველოში მყოფ ამერიკულ კომპანიებს უნდა მოუწოდებდნენ, რომ მათ შეასრულონ საკუთარი ვალდებულება, გადაუხადონ მშროემელბს კუთვნილი ხელფასი და იმოქმედონ კანონის უზანაესობის პრინციპების შესაბამისად საქართველოში“, - წერია დეპუტატის წერილში.

თუ გსურთ, კვლავინდებულად მხარს უჭერდეთ ხელისუფლებას ხალხისთვის და ხალხის მიერ, არ დაუჭიროთ მხარი იმ ამერიკულ კომპანიებს, რომლებიც ღიად არღვევენ მშრომელების უფლებებს საქართველოში და არღვევენ კანონს. ეს პირადპირ ეწინააღმდეგება წერილების სულიკვეთებას. საქართველოს ხელისუფლების პასუხისმგებლობაა დაიცვას, პირველ რიგში, არა ამერიკული კომპანიის, არამედ საკუთარი მოქალაქეების ინტერესები, როდესაც ისინი ერთმანეთს ეწინააღმდეგებიან. ისევე, როგორც ამერიკის შეერთებული შტატების კონგრესის წევრების პასუხისმგებლობაა დარწმუნდნენ იმაში, რომ მათი ქვეყნის წარმომადგენლები, პატივს სცემენ კანონებს და არ ეწევიან მშრომელების ექსპლუატაციას სხვა ქვეყანაში, განსაკუთრებით იმ ქვეყანაში, რომელთანაც 30-წლიანი სტრატეგიული პარტნიორობა აკავშირებთ.
იმედს ვიტოვებ, რომ საკანონმდებლო ხელისუფლების წარმომადგენლები, რომლებმაც დემოკრატიის სახელით გამოთქვეს შეშფოთება, შემდეგ წერილებში არა მხოლოდ დაიცავენ, არამედ, საჭიროების შემთხვევაში, პასუხს მოსთხოვენ საკუთარ კომპანიებსაც“, - სწერს ქართველი დეპუტატი აშშ-ის ელჩსა და ამერიკელ პოლიტიკოსებს. 

„ფრონტერასთან“ დაკავშირებით კომენტარი პარლამენტის ვიცესპიკერმა გიორგი ვოლსკიმ 25 იანვარს გააკეთა. 

„რაც შეეხება „ფრონტერას“, ეს კომპანია საქართველოში 1994 წლიდან მუშაობს და იმ პერიოდიდან გვესაუბრებიან საქართველოში გაზისა და ნავთობის დიდ მარაგზე. მე შიგნით არ ჩავიხედავ, არ ვიცი, ვინ არის მართალი, გაზისა და ნავთობის კორპორაცია, თუ „ფრონტერა“, მაგრამ ყველამ იცის, რომ სტოქჰოლმის საერთაშორისო სასამართლოში იხილება ეს საკითხი.

მაშ, რა საჭიროა ამ საქმის მოყვანა ერთ-ერთ მაგალითად იმისა, რომ თითქოს, ამერიკულ კომპანიებს ავიწროებენ საქართველოში. 200-ზე მეტი კომპანიაა დარეგისტრირებული და მარტო ამ წლის პირველ სამ კვარტალში ამერიკული ინვესტიცია 80 მლნ-ს შეადგენს. რაც მთავარია, საქართველოში საკმაოდ დიდი ინვესტიციით შემოსულია სახელმწიფო ორგანიზაცია „ოპეკი“, რომელიც ფოთში უკვე აწარმოებს ინვესტიციებს“, - განაცხადა გიორგი ვოლსკიმ. 

ოთხმა კონგრესმენმა პრემიერმინისტრ გიორგი გახარიას წერილი 22 იანვარს გაუგზავნა. პრემიერმა წერილი 25 იანვარსაც მიიღო. 

გარდა ამისა, რესპუბლიკელი კონგრესმენი მარკუეინ მალინი გიორგი გახარიასადმი 19 იანვარს გაგზავნილ წერილში „საქართველოს დემოკრატიული ღირებულებებისგან გადახვევითა და ეკონომიკის გაუარესებით“ შეშფოთებულია.

მანამდე კი, ამერიკელმა კონგრესმენებმა, ადამ კინზინგერის თაოსნობით, საქართველოს პრემიერმინისტრს წერილით 2019 წლის 16 დეკემბერსაც მიმართეს და პარლამენტის მიერ პროპორციულ საარჩევნო სისტემაზე უარის თქმის გამო შეშფოთება გამოთქვეს.