გიგი წერეთელი სენატორ ვიკერის წერილზე: მდგომარეობა ძალიან სახიფათო ზღვარს მიუახლოვდა

„ევროპული საქართველოს“ წევრის გიგი წერეთლის განცხადებით, პროპორციულ არჩევნებზე გადასასვლელად ჯერ კიდევ არსებობს ოპოზიციაში მოლაპარაკებებზე მზადყოფნა, რითაც საქართველოს ხელისუფლებამ უნდა ისარგებლოს სხვა შემთხვევაში ვითარება უფრო გამძაფრდება. 

გიგი წერეთლის თქმით, გასულ კვირაში ამერიკელი კონგრესმენების წერილები საქართველოს ხელისუფლების მიმართ „კონსოლიდირებული კრიტიკაა“.

„ყველაზე კრიტიკული გამოსვლა იყო ევროპარლამენტში თუ კონგრესში. მინდა, ხაზი გავუსვა სენატიდან გამოგზავნილ წერილს, ეს არის სენატორ როჯერ ვიკერის წერილი. ეს არის ალბათ ერთ-ერთი ყველაზე გავლენიანი სენატორი, ძალიან მნიშვნელოვანი კომიტეტის ხელმძღვანელი და ამას გარდა, ის არის ჰელსინკის კომისიის თანათავმჯდომარე. ეს კომისია არის ამერიკის ხელისუფლებაში ალბათ მთავარი სტრუქტურა ადამიანის უფლებების და დემოკრატიის კუთხით. გარდა ამისა, ის არის ერთ-ერთი ლიდერი ეუთოს საპარლამენტო ასამბლეის. აქედან გამომდინარე ყველა ის საკითხი, რომელიც აღნიშნულია წერილში მიუთითებს იმაზე, რომ ძალიან სახიფათო ზღვარს მიუახლოვდა მდგომარეობა. ეს ეხება, როგორც მთავარ თემას, ეს არის არჩევნების საკითხი, პროპორციული არჩევნები, ეს არის ბიძინა ივანიშვილის გამონათქვამები ოპონენტებთან დაკავშირებით, პოლიტიკური დევნის მომენტი, რაც აღნიშნული ამ წერილში, ასევე მედიაზე ზეწოლა, სასამართლო რეფორმის საკითხი“, - განაცხადა გიგი წერეთელმა.

მისი თქმით, მიდგომა, რომ ასი სენატორია და ასეთი განცხადება მხოლოდ ერთმა გააკეთა,  დამაზიანებელია. 

ოთხმა კონგრესმენმა პრემიერმინისტრ გიორგი გახარიას წერილი 22 იანვარს გაუგზავნა. პრემიერმა წერილი 25 იანვარსაც მიიღო. 

გარდა ამისა, რესპუბლიკელი კონგრესმენი მარკუეინ მალინი გიორგი გახარიასადმი 19 იანვარს გაგზავნილ წერილში „საქართველოს დემოკრატიული ღირებულებებისგან გადახვევითა და ეკონომიკის გაუარესებით“ შეშფოთებულია.

მანამდე კი, ამერიკელმა კონგრესმენებმა, ადამ კინზინგერის თაოსნობით, საქართველოს პრემიერმინისტრს წერილით 2019 წლის 16 დეკემბერსაც მიმართეს და პარლამენტის მიერ პროპორციულ საარჩევნო სისტემაზე უარის თქმის გამო შეშფოთება გამოთქვეს.