კახა კუჭავა: მაქსიმალურად შევეცდებით რუსულ დელეგაციას ევროსაბჭოში დისკომფორტი შევუქმნათ

„მაქსიმალურად შევეცდებით რუსეთის დელეგაციას შევუქმნათ ყველანაირი დისკომფორტი ევროსაბჭოს საპარლამენტო ასამბლეაში მათი მუშაობის კუთხით“, - განაცხადა საქართველოს პარლამენტის თავმჯდომარის მოადგილემ, კახაბერ კუჭავამ მას შემდეგ, რაც ევროპის საბჭოს საპარლამენტო ასამბლეამ მხარი არ დაუჭირა უკრაინისა და პარტნიორი ქვეყნების წარმომადგენელთა წინადადებას რუსეთის დელეგაციის უფლებამოსილების შეზღუდვის თაობაზე და რუსეთს უფლებამოსილება სრულად აღუდგინა.

კახაბერ კუჭავას თქმით, „დღევანდელ ამ გადაწყვეტილებას წინ უძღოდა გადაწყვეტილება მინისტრთა საბჭოს მიერ, ეს ფაქტობრივად წინაპირობა იყო იმისა, რომ ალბათ ასეც მოხდებოდა და ეს ვიცოდით. თუმცა, ჩვენ შევეცადეთ ბოლომდე. სამწუხარო იყო, რომ საბოლოო გადაწყვეტილება მათ სასარგებლოდ იყო მიღებული, მით უმეტეს იმ სამარცხვინო გამოსვლების შემდეგ, რომელიც მათ ჰქონდათ ტრიბუნაზე, თუმცა ვთვლით, რომ აუცილებელი იყო დღეს დაფიქსირებულიყო ის, რაც დაფიქსირდა ჩვენი მხრიდან, უკრაინელების მხრიდან, სხვა ჩვენი ქვეყნების მეგობარი და მომხრეების მხრიდან. დარწმუნებული ვარ, რომ ეს მხოლოდ დასაწყისია და კიდევ უფრო გავურთულებთ მათ მუშაობას. მაქსიმალურად შევეცდებით, შევუქმნათ ყველანაირი დისკომფორტი ევროსაბჭოს საპარლამენტო ასამბლეაში მათი მუშაობის კუთხით“.

ევროსაბჭოს საპარლამენტო ასამბლეამ პლენარულ სესიაზე რუსეთის დელეგაციისთვის უფლებამოსილების დამტკიცებას მხარი დაუჭირა. რუსული მედიის ცნობით, გადაწყვეტილებას ასამბლეის 96 წევრმა დაუჭირა მხარი, წინააღმდეგი 44 იყო. სტრასბურგში გამართულ კენჭისყრაში რუსეთის დელეგაციის წევრებს მონაწილეობის მიღების უფლება არ ჰქონდათ.

ევროპის საბჭოს საპარლამენტო ასამბლეამ 2019 წლის 26 ივნისს რუსეთის დელეგაციის უფლებამოსილება აღიარა. კენჭისყრის შედეგების თანახმად, რომელსაც 116 მომხრე და 16 წინააღმდეგი ჰყავდა, რუსეთის სათათბიროს წევრები საპარლამენტო ასამბლეაზე სრულფასოვან მუშაობას დაუბრუნდნენ. დელეგაცია ასევე მონიტორინგის და ასამბლეის სხვა კომიტეტების მუშაობაში ჩაერთო.

2019 წლის 1-ელ ოქტომბერს საქართველომ, ესტონეთმა, ლატვიამ, ლიეტუვამ და უკრაინის დელეგაციებმა ერთობლივი განცხადება გაავრცელეს და ევროსაბჭოს საპარლამენტო ასამბლეაში რუსეთის ფედერაციის დაბრუნება და ხმის უფლების აღდგენა გააპროტესტეს.