თეა წულუკიანი: წერილების ზოგიერთი ავტორი პასუხისგებაში სააკაშვილის მიცემასაც აპროტესტებდა

იუსტიციის მინისტრის თეა წულუკიანის განცხადებით, საქართველოს სტრატეგიული პარტნიორის წარმომადგენლობითი და სხვა ორგანოების წევრების მიერ მოწერილ წერილს თუ სხვა ტიპის შეტყობინებას დიდი ყურადღებით ეცნობა. ამის შესახებ მინისტრმა მთავრობის სხდომის დასრულების შემდეგ მედიასთან განაცხადა.

თუმცა, როგორც წულუკიანი ამბობს, ზოგიერთი წერილი გასაკვირია, რადგან არ კეთდება წერილებში აქცენტი რუსეთის ოკუპაციაზე, რომელსაც წულუკიანის განცხადებით, საქართველომ და აშშ-მა ერთობლივად უნდა გააგრძელონ ბრძოლა. 

ასევე მინისტრი აცხადებს, რომ ზოგი წერილის ავტორი რამდენიმე წლის წინ მიხეილ სააკაშვილის პასუხისგებაში მიცემასაც აპროტესტებდა. 

„ვხედავთ, რომ ზოგ მათგანში განსაკუთრებით, არის გასაკვირი ნაწილები. მაგალითად ის, რომ ზოგიერთი კონგრესმენი მაშინ, როდესაც საერთაშორისო არბიტრაჟში დავა მიმდინარეობს, წინასწარ შეფასებებს აკეთებს, რაც დავის მიმდინარეობს ზიანს აყენებს. კარგი იქნება თუ ყველანი, სანამ საერთაშორისო არბიტრაჟი არ დასრულებულა „ფრონტერას“ საქმეზე, თავს შევიკავებთ წინასწარი განცხადებებისგან.

ჩვენთვის ძალიან მნიშვნელოვანია ისიც, რომ მოცემულ კომპანიას, ჰყავს ბევრი ჩვენი მოქალაქე, რომელსაც ხელფასის გაცემა მრავალი თვეა შეუწყდა და შედეგად სარჩო-საბადებლისა და ოჯახის რჩენის პრობლემა გაუჩნდა.

ასევე გასაკვირია, რომ ამ წერილებში ან საერთოდ არ კეთდება, ან ძალიან მცირე დოზით კეთდება აქცენტი იმაზე, რაც ჩვენ და ჩვენს სტრატეგიულ პარტნიორს, ამერიკის შეერთებული შტატების მთავრობას, გვაწუხებს და რომლის წინააღმდეგაც ერთად უნდა გავაგრძელოთ ბრძოლა, ეს არის ჩვენი ქვეყნის ოკუპაცია და ტერიტორიული მთლიანობა. რაც შეეხება დემოკრატიას, საქართველოში დემოკრატიული პროცესი ასეთი მაღალი ხარისხის, როგორიც დღეს არის არასოდეს ყოფილა დამოუკიდებლობის შემდეგ“, - განაცხადა იუსტიციის მინისტრმა თეა წულუკიანმა.

„ამ წერილების ავტორებიდან ზოგიერთი, მახსოვს და იმედია არ მეშლება, რამდენიმე წლის წინ იმასაც აპროტესტებდა და აგზავნიდა წერილებს, რომ რატომ მიეცა მიხეილ სააკაშვილი სისხლის სამართლის პასუხისგებაშიო. ჩვენ გავაგრძელებთ ყურადღებით გავეცნოთ მეგობარი და მით უმეტეს სტრატეგიული პარტნიორისგან მიღებულ წერილებს, მაგრამ ჩვენ იმისთვის ვართ დამოუკიდებელი სახელმწიფო და ზრდასრული ადამიანები, რომ სწორი ანალიზი გავაკეთოთ თითოეული ტექსტისა“, - განაცხადა თეა წულუკიანმა. 

ამერიკის შეერთებული შტატების სენატის საგარეო ურთიერთობათა კომიტეტის თავმჯდომარე, რესპუბლიკელი სენატორი ჯიმ რიში და ევროპის ქვეკომიტეტის უმცირესობის დემოკრატი ლიდერი, სენატორი ჯინ შაჰინი საქართველოს მთავრობას წერილით მიმართავენ. 

ისინი გზავნილში პარტია "ქართული ოცნება - დემოკრატიული საქართველოს" თავმჯდომარეს, ბიძინა ივანიშვილს აკრიტიკებენ. როგორც წერილშია აღნიშნული, პროპორციული საარჩევნო რეფორმის ჩაგდება და მშვიდობიანი პროტესტის ძალადობრივი ფორმით ჩახშობა ქვეყანაში დემოკრატიის დასუსტებაზე მიუთითებს. სენატორები ოპოზიციის ლიდერებზე თავდასხმის ფაქტებზეც წერენ. დოკუმენტში განსაკუთრებული შეშფოთებაა გამოთქმული უზენაესი სასამართლოში უვადოდ დანიშნული მოსამართლეების კვალიფიკაციასთან დაკავშირებითაც. სენატორების განცხადებით, ქვეყანაში რეფორმების შეფერხება და შიდა დაძაბულობის ზრდა რუსეთს საქართველოს საქმეებში მეტად ჩარევის საშუალებას მისცემს.