სოფო კილაძე: „ქართულმა ოცნებამ“ პარტნიორებისთვის ზუსტი ინფორმაციის მისაწოდებლად მეტი უნდა იმუშაოს

„ქართულმა ოცნებამ“ საერთაშორისო პარტნიორებთან დეზინფორმაციის აღმოსაფხვრელად მეტი უნდა იმუშაოს, - ამის შესახებ „იმედის“ გადაცემა „დღის ქრონიკაში“ სოფო კილაძემ განაცხადა. პარლამენტის ადამიანის უფლებათა დაცვის კომიტეტის თავმჯდომარე ფიქრობს, რომ ბოლო დროს მიღებული წერილები საქართველოში უნდა აღიქვან ისე, როგორც იმ ქვეყნის პოზიცია, რომელსაც საქართველოზე გული შესტკივა.

„რა თქმა უნდა, ამ შემთხვევაში არ არის გამორიცხული, რომ გარკვეულწილად არასწორი ინფორმაცია აქვთ, რასაც სჭირდება, ბუნებრივია, მეტი მუშაობა ჩვენი მხრიდან. აქ ვხედავ მე სერიოზულად ლუფტს, რომ ჩვენ მეტი სამუშაო გვაქვს ჩვენ პარტნიორებთან. როგორც მოგეხსენებათ, იგეგმება საქართველოს პარლამენტის წევრების ვიზიტი აშშ-ში და მე ძალიან დიდი იმედი მაქვს, რომ ძალიან მჭიდრო თანამშრომლობის კიდევ ერთი მაგალითი იქნება ეს ვიზიტი, სადაც ჩვენი დელეგაცია მიაწოდებს სრულ და რეალურ, ობიექტურ ინფორმაციას ჩვენს მეგობრებს“, - განაცხადა კილაძემ. 

მისივე თმით, აშშ-ის ოფიციალური პოზიცია საქართველოს სერიოზულ პროგრესს დემოკრატიის მიმართულებით აღიარებს. გარკვეული კონგრესმენების და სენატორების კრიტიკულ შენიშვნებს კი კილაძე ოპოზიციის დესტრუქციულ ქმედებებს უკავშირებს.

„ეს არის სამუშაო პროცესი. როდესაც ჩვენ ქვეყანაში მიმდინარეობს გარკვეული დემოკრატიული პროცესები, როდესაც ჩვენ ქვეყანას აქვს გარკვეული სირთულეები მათ შორის ოპოზიციასთან დაკავშირებით, ვხედავთ, რომ ისინი უკიდურესად დესტრუქციულები არიან. ასე დესტრუქციულად არიან ასევე აქტიურები, სამწუხაროდ, ევროსაბჭოში, ასევე ამერიკის შეერთებულ შტატებში. ბუნებრივია, ისინი მუშაობენ, რომ არასწორი ინფორმაცია იყოს მიწოდებული ჩვენ პარტნიორებთან. ამას ჩვენ ვხედავთ ყოველდღიურ რეჟიმში, ისინი რა დღეში არიან, როგორი დესტრუციულები არიან და როგორ გამიზნულად ვნებენ ჩვენი ქვეყნის ინტერესებს“, - აღნიშნა კილაძემ.  

მისი თქმით, ქვეყნის იმიჯის შელახვას ოპოზიცია ევროპარლამენტშიც ცდილობს, თუმცა ბრიუსელსა და სტრასბურგში საქართველოს პროგრესს დემოკრატიის თვალსაზრისით ყველა აღიარებს. 

კილაძე საპარლამენტო ასამბლეის მონიტორინგის კომიტეტის რეზოლუციის პროექტსაც შეეხო და აღნიშნა, რომ საბოლოო რეზოლუციის მიღებამდე ქართული დელეგაცია პროექტის განხილვაზე ცვლილებების შეტანაზე იმუშავებს. 

„მნიშვნელოვანი არის ის, რომ საქართველოს პროგრესი ზოგადად დემოკრატიის კუთხით არის დაფიქსირებული და იყო რამდენიმე საკითხი, რაზეც ჩვენ ვმუშაობთ და ვფიქრობთ, რომ ეს მიმართულებები ამ კუთხით არ უნდა იყოს ასახული. ჩვენი უკვე წარვადგინეთ ჩვენი ცვლილებები და ვფიქრობთ, რომ ამას გაითვალისწინებს ასამბლეა საბოლოო ჯამში“, - თქვა კილაძემ. 

კილაძემ კომენტარი რუსული დელეგაციის შესაძლო ვიზიტის შესახებ გააკეთა. მისი თქმით, „ქართულ ოცნებას“ ამ საკითხზე გადაწყვეტილება მიღებული ჯერ არ აქვს. 

ამერიკის შეერთებული შტატების სენატის საგარეო ურთიერთობათა კომიტეტის თავმჯდომარე, რესპუბლიკელი სენატორი ჯიმ რიში და ევროპის ქვეკომიტეტის უმცირესობის დემოკრატი ლიდერი, სენატორი ჯინ შაჰინი საქართველოს მთავრობას წერილით 30 იანვარს მიმართეს.