ბაქრაძე: აშშ-ის კერძო სექტორი სწორად ხედავს ჩვენს სტრატეგიულ მნიშვნელობას შემდგომი ინვესტირებისთვის

ჩვენ ვნახეთ გასული წლის განმავლობაში როგორ იზრდებოდა აშშ-დან ინვესტიციების რაოდენობა, - ამის შესახებ აშშ-ში საქართველოს ელჩმა, დავით ბაქრაძემ გადაცემა „არენაში“ განაცხადა. 

„თავისუფალი ვაჭრობის თვალსაზრისით ბოლო წელმა კიდევ უფრო გააძლიერა ამ საკითხზე საუბრების დინამიკა ვაშინგტონში. ჩვენ ვიხილეთ ამერიკის შეერთებული შტატების კონგრესის უნიკალური ისტორიული დოკუმენტი საქართველოს მხარდაჭერის აქტი, რომელიც წარმომადგენლობითმა პალატამ მიიღო, რომელშიც პირდაპირ არის მოწოდება, რომ დაიწყოს მოლაპარაკებები ამერიკის სავაჭრო წარმომადგენლის მიმართ.

ვნახეთ, არაერთი სამეცნიერო კვლევითი ცენტრის წარმომადგენლის და სხვათა სტატიები, მოსაზრებები, რომლითაც საქართველოსთან თავისუფალი ვაჭრობის შესახებ შეთანხმებას მიესალმებიან. ეს თანამიმდევრულობა გამოიხატება ჩვენს საქმიანობაშიც“, - განაცხადა ელჩმა.

დავით ბაქრაძის თქმით, მნიშნვნელოვანია გავითვალისწინოთ, რომ აშშ-ისთვის პრიორიტეტული იყო და რჩება იმ დიდ სახელმწიფოებთან სავაჭრო შეთანხმებები, როგორიც არის კანადა და მექსიკა, ჩინეთი, ევროკავშირი და ა.შ.

„სწორედ ამის ფონზე, განსაკუთრებით მნიშვნელოვანია, რომ ისეთი პატარა სახელმწიფოსთვის, როგორიც საქართველოა, მოიძებნა ადგილი დისკუსიისთვის და ამის ირგვლივ აზრი კონსოლიდირებულია. აუცილებლად გაჩნდება სივრცე, მათ შორის, სავაჭრო წარმომადგენლის ოფისში, რომელიც მეტ დროს დაუთმობს სწორედ ამ დოკუმენტის წინ წაწევას.

ჩვენ ვნახეთ გასული წლის განმავლობაში როგორ იზრდებოდა აშშ-დან ინვესტიციების რაოდენობა. განსაკუთრებით აღსანიშნავია, რომ ჩვენ მივიღეთ ინვესტიციები გასულ წელს ისეთ ინფრასტრუქტურულ და მნიშვნელოვან პროექტებში, როგორიც ფოთის პორტია. კერძოდ, აშშ-ის საგარეო ინვესტირების კორპორაციამ 50 მილიონით დააფინანსა ფოთის პორტის გაფართოება, კერძო სექტორიდან „ტრამომ“ 30 მილიონამდე ინვესტიცია განახორციელა ბათუმის პორტში. ეს არის მნიშვნელოვანი იმ თვალსაზრისით, რომ აძლიერებს საქართველოს, როგორც რეგიონული კვანძის ფუნქციას და მნიშვნელობას. აქედან გამომდინარე, სწორად ხედავენ საქართველოს სტრატეგიულ მნიშვნელობას მათი შემდეგომი ინვესტირებისთვის, აქტიურობისთვის. ეს გვაძლევს საფუძველს, ვივარაუდოთ, რომ საქართველო და ეს მიმართულება აშშ-სთვის პრიორიტეტულად დარჩება“, - განაცხადა აშშ-ში საქართველოს ელჩმა დავით ბაქრაძემ.