კახა კუჭავა: ამერიკელ კონგრესმენებთან და სენატორებთან შეხვედრისას გაირკვა, რომ მათ არ ჰქონდათ სრული ინფორმაცია გარკვეულ საკითხებზე, მათ შორის „ფრონტერას“ წინააღმდეგ არსებული საარბიტრაჟო დავაზე

ამერიკელ კონგრესმენებთან და სენატორებთან შეხვედრისას გაირკვა, რომ მათ არ ჰქონდათ სრული ინფორმაცია გარკვეულ საკითხებთან დაკავშირებით, მათ შორის კომპანია „ფრონტერას“ წინააღმდეგ არსებული საარბიტრაჟო დავის შესახებ, - ამის შესახებ ჟურნალისტებს აშშ-ში ვიზიტად მყოფმა საქართველოს პარლამენტის ვიცე-სპიკერმა კახა კუჭავამ განუცხადა. მისი თქმით, 2020 წლის განმავლობაში საპარლამენტო თანამშრომლობის ფორმატები შეერთებულ შტატებთან უფრო ინტენსიური იქნება.

საპარლამენტო დელეგაციის წევრები, პარლამენტის თავმჯდომარის ხელმძღვანელობით სახელმწიფო ვიზიტის ფარგლებში ამერიკელ კონგრესმენებსა და სახელმწიფო დეპარტამენტის მაღალჩინოსნებთან მართავენ შეხვედრებს. ვიზიტის პირველ დღეს ქართველ კანონმდებლებს ამერიკის კონგრესში უმასპინძლეს, სადაც 20-მდე კონგრესმენთან გაიმართა შეხვედრა.

„ტელეიმედის“ ადგილობრივი კორესპონდენტის, დემნა დევდარიანის ინფორმაციით, შეხვედრები კონგრესმენების მხრიდან დადებითად შეფასდა და აღინიშნა, რომ მხარეებს პოზიტიური, მეგობრული და მნიშვნელოვანი საუბარი ჰქონდათ როგორც ორი ქვეყნის სტრატეგიული მოკავშირეობის დღის წესრიგის გაძლიერებასა და გაღრმავებაზე, აგრეთვე, საქართველოში მიმდინარე პოლიტიკურ ვითარებაზეც.

კონგრესმენებისა და სენატორების მხრიდან კი არაერთხელ გაესვა ხაზი შეერთებული შტატებისათვის საქართველოს მნიშვნელობას და თანამშრომლობის გაფართოების რეალური შესაძლებლობების გამოყენებას ეკონომიკის, თავდაცვისა და პოლიტიკური თვალსაზრისით.

საპარლამენტო დელეგაცია ვაშინგტონში 10 თებერვლამდე დარჩება. ვიზიტის მომდევნო დღეებში დაგეგმილია მაღალი რანგის შეხვედრები სახელმწიფო მდივნის წარმომადგენელთან ფილიპ რიკერთან, ასევე ამერიკის საერთაშორისო განვითარების სააგენტოს ადმინისრატორის წარმომადგენელ ბროკ ბიერმანთან.