ირაკლი კობახიძე: ოპოზიციის მიერ თავსმოხვეული გზავნილია, რომ რაც პროპორციული არ არის, ის უსამართლოა

ოპოზიციის მიერ თავსმოხვეული ტყუილია, რომ რაც პროპორციული არ არის, ის უსამართლოა და ეს პირდაპირ არის გაშიფრული ODIHR-ის დასკვნაში, - ამის შესახებ საპარლამენტო უმრავლესობის წევრმა, ირაკლი კობახიძემ „დღის ქრონიკაში“ განაცხადა, სადაც ე.წ. გერმანულ მოდელთან დაკავშირებით ეუთოს დასკვნაზე იმსჯელეს.

ეუთოს რეკომენდაციას კონსენსუსის მიღწევაზე, ირაკლი კობახიძე მნიშვნელოვანს უწოდებს, თუმცა აცხადებს, რომ აქ კონტექსტია გასათვალისწინებელი. კერძოდ ის, თუ როგორი უპასუხისმგებლოა ოპოზიცია. ამის მაგალითად კობახიძეს შემდეგი გარემოება მოჰყავს:  

„ჩვენ გავაკეთეთ განაცხადი პროპორციულ საარჩევნო სისტემასთან დაკავშირებით და ამის შემდეგ რამდენიმე თვე არ გავიდნენ ქუჩიდან. ასეთ ოპოზიციას როგორ უნდა ელაპარაკო კონსენსუსზე, ჩემთვის აბსოლუტურად წარმოუდგენელია.

ისინი, არც 2016 წელს იყვნენ კონსენსუსისთვის მზად. სხვათა შორის, მაშინ უსუფაშვილი ელაპარაკებოდა ოპოზიციას და ვერ დაარწმუნა ისინი. უფრო მეტიც, უსუფაშვილის განცხადებას გაგახსენებთ: როგორ შეიძლებოდა რაიმე საკონსტიტუციო ცვლილება გაგვეტანა, როდესაც ამას „ქართული ოცნების“ კოალიციის და „ნაციონალური მოძრაობის“ ხმები ერთად სჭირდებოდაო.

თუ მაშინ შეუძლებელი იყო კონსენსუსის მიღწევა, დღეს როგორ არის ეს შესაძლებელი?! ყველა სიტყვასა და წინადადებაში იტყუებიან“, - განაცხადა ირაკლი კობახიძემ. 

„ვერ წარვადგენთ ისეთ ინიციატივას, რომელიც საპარლამენტო უმრავლესობას დაგვიშლის და ეს კარგად იციან ოპოზიციის წარმომადგენლებმა.  

ჩვენ წარდგენილი გვაქვს წინადადება 100-50 თან დაკავშირებით, ეს არის ერთადერთი ვარიანტი, რომელიც უფრო მეტად პროპორციულს ხდის საარჩევნო სისტემას და რომელიც არ იწვევს უარყოფით პროცესებს საპარლამენტო უმრავლესობაში. 

ვითვალისწინებთ საერთაშორისო პარტნიორების რჩევას და ვაგრძელებთ კონსულტაციებს, მაგრამ ეს კონსულტაციებიც დიდხანს ვერ გაგრძელდება. ჩვენ გვჭირდება პასუხი ჩვენს შეთავაზებაზე - ან მივიღებთ დადებით პასუხს, ან დარჩება ის სისტემა, რომელიც ამავე ODIHR-ის დასკვნით არის ასევე სამართლიანი. 100-50-ზეც სამართლიანია და 77-73-ც, ამას გვეუბნება ODIHR-ი, რომელიც უფრო სანდოა, ვიდრე სუბიექტური დავით უსუფაშვილი, რომელიც სხვა რამეს გვეუბნება.  

ჩვენ მზად ვართ კომპრომისთვის, თუ ოპოზიცია დაგვთანხმდება ჩვენს შეთავაზებაზე, რისი რესურსიც არსებობს, მიუხედავად იმ უპასუხისმგებლობისა, რასაც ისინი ავლენენ, საბოლოო ჯამში, ჩვენ მივაღწევთ შეთანხმებას სისტემასთან დაკავშირებით“, - აღნიშნა კობახიძემ.