როგორ გადანაწილდნენ ყოფილი მაღალჩინოსნები სამოქალაქო სექტორში

საქართველოში 2012 წელს ხელისუფლების ცვლილების შემდეგ, „ნაციონალური მოძრაობის“ მაშინდელი პოლიტიკური ლიდერების ნაწილმა მესამე სექტორში გადაინაცვლა. ზოგიერთმა მათგანმა კი თავად შექმნა არასამთავრობო ორგანიზაცია. მესამე სექტორში გადანაცვლებულ პირებს შორის არიან: ბათუ ქუთელია, ნიკოლოზ ვაშაკიძე, ეკა ტყეშელაშვილი და ა.შ.

ვინ, სად და რომელ ორგანიზაციაში მუშაობს დღეს - ამის შესახებ ვიდეო გადაცემა „არენამ“ მოამზადა:

1.    ბათუ ქუთელია - 2004 წელს სახელმწიფო უშიშროების მინისტრის მოადგილედ მუშაობდა, 2005-2006 წლებში ხელმძღვანელობდა საქართველოს დაზვერვის სამსახურს, 2007-2008 წლებში იყო თავდაცვის მინისტრის პირველი მოადგილე, 2008-დან 2011 წლამდე გახლდათ საქართველოს საგანგებო და სრულუფლებიანი ელჩი აშშ-ში, კანადასა და მექსიკაში.  2011 წლიდან 2013 წლის ნოემბრამდე იკავებდა საქართველოს ეროვნული უშიშროების საბჭოს მდივნის მოადგილის პოსტს, ამ პოლიტიკური თანამდებობის შემდეგ კი, გახდა არასამთავრობო ორგანიზაცია საქართველოს ატლანტიკური საბჭოს ვიცე-პრეზიდენტი და მაკკეინის საერთაშორისო ლიდერობის ინსტიტუტის თანამშრომელი. 

2.    ნიკოლოზ ვაშაკიძე, საგარეო საქმეთა მინისტრის ყოფილი მოადგილე იყო, ხელისუფლების ცვლილების შემდეგ, საზოგადოება „ივერია“ შექმნა. მოგვიანებით, ისევ "ნაციონალური მოძრაობის" რიგებში, "გაერთიანებულ ოპოზიციას" შეუერთდა.

3.    მამუკა გამყრელიძე, "ნაციონალური მოძრაობის" ხელისუფლებაში ყოფნის პერიოდში იყო ელჩი ჩინეთში, ხელისუფლების ცვლილების კი შემდეგ, ისიც ჯერ საზოგადოება „ივერიას“ შეურთდა, მოგვიანებით კი, პოლიტიკურ გაერთიანებაში აღმოჩნდა "ნაციონალურ მოძრაობასთან" ერთად.  

4.    დავით სიხარულიძე იყო ეროვნული უშიშროების საბჭოს მდივნის მოადგილე. 2006 წლის 1 მარტს დაინიშნა აშშ-ში, კანადასა და მექსიკაში საქართველოს საგანგებო და სრულუფლებიან ელჩად. 2008 წლის დეკემბრიდან 2009 წლის აგვისტომდე იყო საქართველოს თავდაცვის მინისტრი. მუშაობდა საქართველოს პრეზიდენტის მრჩევლად საგარეო პოლიტიკის საკითხებში. ხელისუფლების ცვლილების შემდეგ, არასამთავრობო ორგანიზაცია საქართველოს ატლანტიკური საბჭოს გამგეობის თავმჯდომარე გახდა.

5.    ეკა ტყეშელაშვილი, 2004-2005 წლებში საქართველოს იუსტიციის მინისტრის მოადგილე იყო; 2006 წელს დაინიშნა საქართველოს შინაგან საქმეთა მინისტრის მოადგილედ, შემდე კი თბილისის სააპელაციო სასამართლოს თავჯდომარედ. 2007-2008 წლებში იყო საქართველოს იუსტიციის მინისტრი; 2008 წელს დაინიშნა საქართველოს გენერალურ პროკურორად, იმავე წელს კი გადაინაცვლა საქართველოს საგარეო საქმეთა მინისტრის პოზიციაზე; 2010 წელს იყო ეროვნული უშიშროების საბჭოს მდივანი. ხელისუფლების ცვლილების შემდეგ კი, ხელმძღვანელობს არასამთავრობო ორგანიზაცია საქართველოს სტრატეგიული კვლევების ინსტიტუტს. 

6.    შოთა უტიაშვილი მთავრობის კანცელარიის საგარეო და საზოგადოებრივი  ურთიერთობის დეპარტამენტში მუშაობდა, ხელმძღვანელობდა შინაგან საქმეთა სამინისტროს ანალიტიკური დეპარტამენტს, 2012 წელს, არჩევნებამდე ის დაინიშნა საქართველოს სასჯელაღსრულების, პრობაციისა და იურიდიული დახმარების საკითხთა სამინისტროში მინისტრის პირველ მოადგილედ დაინიშნა, ახლა კი რონდელის ფონდის მეცნიერ-თანამშრომელია.  

7.    ყოფილმა მაღალი თანამდებობის პირებმა, ხელისუფლების ცვლილების შემდეგ გადაინაცვლეს საქართველოს რეფორმების ასოციაციაში, რომლის დამფუძნებლებად დღემდე მითითებულნი არიან „ევროპული საქართველოს“ ლიდერები სერგი კაპანაძე და ელენე ხოშტარია, ამავე ორგანიზაციაშია თინა ბურჯალიანი. თინა ბურჯალიანი, რომელიც ხელისუფლების ცვლილებამდე ზურა ადეიშვილის მოადგილე იყო და საქართველოს იუსტიციის სამინისტროში მინისტრის პირველი მოადგილის თანამდებობა ეკავა.