დავით ზალკალიანი ვაშინგტონში ვიზიტზე: ერთია როგორი კითხვები მოდიოდა შეხვედრის დასაწყისში და შემდგომ კომუნიკაციის შედეგად განსხვავებული პოზიციები ფიქსირდებოდა

საგარეო საქმეთა მინისტრმა „იმედის“ გადაცემა „შაბათის ქრონიკაში“ აშშ-ში ოფიციალური ვიზიტი შეაჯამა. დავით ზალკალიანმა, რომელიც ვაშინგტონიდან რამდენიმე საათის წინ დაბრუნდა, განაცხადა, რომ შტატებში მისი ჩასვლა ძალიან მნიშვნელოვანი და დროული იყო, პარტნიორებთან შეხვედრები საკმაოდ შინაარსიანი გამოდგა. 

„მქონდა უაღრესად მნიშვნელოვანი ვიზიტი. იყო საკმაოდ საჭირო, დროული. საკმაოდ შინაარსიანი და დატვირთული დღის წესრიგი გამოვიდა, გამომდინარე იქიდან, რომ მე მქონდა შეხვედრები არა მხოლოდ საკანონმდებლო ხელისუფლების წარმომადგენლებთან, არამედ ამერიკის შეერთებული შტატების სახელმწიფო მდივნის მიერ მიწვეული გახლდით მნიშვნელოვან ღონისძიებაზე, რომელიც იყო დაკავშირებული ამერიკის მიერ ინიცირებულ ახალ კოალიციასთან. ეს გახლავთ ქვეყნები, რომლებიც არიან საკმაოდ წინ წაწეული ქვეყანაში დემოკრატიული განვითარების კუთხით. საქმე ეხებოდა რელიგიის თავისუფლების საკითხებს. იმ 25 ქვეყანას შორის, რომლებიც მიიწვია აშშ-მა, 10 საგარეო საქმეთა მინისტრი გახლდათ, მათ შორის ვიყავი მეც და ვფიქრობ, რომ ეს იყო კიდევ ერთი აღიარება აშშ-ის, ჩვენი მთავარი სტრატეგიული პარტნიორის მხრიდან იმ რეფორმების, რომლებსაც ქვეყანა ახორციელებს დემოკრატიული ფასეულობების განმტკიცების კუთხით“, - განაცხადა ზალკალიანმა. 

მინისტრის თქმით, მან ეს ფორმატი მაქსიმალურად გამოიყენა, რომ საქართველოს ოკუპირებულ ტერიტორიებზე არსებული ჰუმანიტარული სიტუაციის შესახებ ესაუბრა. განსაკუთრებით კი ხაზი რელიგიის თავისუფლების მხრივ არსებულ პრობლემებს და ქართულ ეკლესია-მონასტრებში არსებულ მძიმე მდგომარეობას გაუსვა. 

ზალკალიანმა ამერიკელ ექსპერტებთან შეხვედრებზეც ისაუბრა და აღნიშნა, რომ დელეგაციის წევრებმა მაქსიმალურად გამოიყენეს ვიზიტი იმისთვის, რომ საქართველოს მთავარი სტრატეგიული პარტნიორისთვის ქვეყანაში მიმდინარე მოვლენების შესახებ სანდო და ობიექტური ინფორმაცია მიეწოდებინათ. 

„მათ ძალიან ბევრი ინფორმაცია აქვთ, როგორც საქართველოდან, ისე სხვადასხვა ექსპერტული საზოგადოებიდან, სამთავრობო სტრუქტურებიდან, საელჩოებიდან, ოპოზიციიდან. აქედან გამომდინარე ჩვენთვის მნიშვნელოვანია, რომ ყველა მიმართულებით იყოს რაც შეიძლება აქტიური კომუნიკაცია, რათა ზუსტი, ამომწურავი ინფორმაცია მივაწოდოთ ქვეყანაში მიმდინარე პროცესებთან დაკავშირებით და ვფიქრობ, რომ იყო ძალიან კარგი შესაძლებლობა იმისთვის, რომ პირველი წყაროდან მიეღოთ მათ ყველა მათთვის საინტერესო კითხვაზე პასუხი. ვფიქრობ, მე ეს შევძელი, გამომდინარე იქიდან, რომ გვქონდა უაღრესად პოზიტიური გამოხმაურებები. ერთია როგორი კითხვები მოდიოდა შეხვედრის დასაწყისში და შემდგომ, კომუნიკაციის შედეგად, განსხვავებული პოზიციები ფიქსირდებოდა“, - აღნიშნა მინისტრმა.  

დავით ზალკალიანის ვიზიტი აშშ-ში 4-7 თებერვალს გაიმართა. მინისტრი კონგრესმენებს, სენატორებს და ექსპერტებს შეხვდა და სხვადასხვა ღონისძიებებში მიიღო მონაწილეობა. ვაშინტონში შეხვედრებს საპარლამენტო დელეგაცია აგრძელებს არჩილ თალაკვაძის ხელმძღვანელობით.