ადამ კინზინგერი: აუცილებელია საქართველოში ყველა პარტია კომპრომისზე წავიდეს

აშშ-ის კონგრესის წარმომადგენელთა პალატაში საქართველოს მეგობარი ჯგუფის თანათავმჯდომარე კონგრესმენი, რესპუბლიკელი ადამ კინზინგერი საქართველოს პარლამენტის თავმჯდომარის, არჩილ თალაკვაძის შტატებში ვიზიტის ფარგლებში გამართულ შეხვედრას Twitter-ზე ეხმაურება.

„საქართველოს პარლამენტის თავმჯდომარესთან მქონდა პროდუქტიული შეხვედრა, რომლის დროსაც ორივემ კიდევ ერთხელ დავადასტურეთ საქართველო-ამერიკის ურთიერთობების საერთო მიზნები. მივესალმები პარლამენტის თავმჯდომარის მხრიდან გამოვლენილ ძალისხმევას ვიზიტთან და ჩვენი მოკავშირეობის მნიშვნელობის შესახებ გამართულ დისკუსიასთან დაკავშირებით. მე ვაფასებ ჩვენს მეგობრობას. ჩვენი შეხვედრის შემდეგ მონაწილეობა მივიღე დიალოგში სხვადასხვა მხარესთან, რომლებიც ჩართულნი არიან საქართველოს პოლიტიკურ კრიზისში. იმ დროს, როდესაც პროგრესს მივაღწიეთ, ჩემთვის აშკარა გახდა, რომ გადაუჭრელი განსხვავებები მმართველ პარტიასა და ოპოზიციას შორის გაგრძელდება. დემოკრატია არაა ადვილი და იმ დროს, როცა საპროტესტო აქციები თავისუფალ ქვეყანაში ნორმალურია, აუცილებელია, რომ მათ შეინარჩუნონ მშვიდობიანი ფორმა.

აგრეთვე მოქალაქეებმა უნდა იცხოვრონ იმ გარანტიით, რომ მათი მართლმსაჯულების სისტემა იქნება სამართლიანი ყველას მიმართ, დამოუკიდებელი და პოლიტიკური მიკუთვნებულობისგან თავისუფალი. აუცილებელია, საქართველოში ყველა პარტია კომპრომისზე წავიდეს, რათა ქვეყანამ მიაღწიოს დემოკრატიას და თავისუფლებას, რომლისკენაც ის ისწრაფვის. როგორც წარმომადგენელთა პალატაში საქართველოს მეგობართა ჯგუფის თანათავმჯდომარე, საქართველო-ამერიკის ძლიერი და მტკიცე ურთიერთობის ერთგული ვრჩები“, - წერს ადამ კინზინგერი.