მარინა კალიურანდი: ძალიან გთხოვთ ყველას, დასხედით ერთ მაგიდასთან და ესაუბრეთ ერთმანეთს

საპარლამენტო ასოცირების საბჭოს თანათავმჯდომარე მარინა კალიურანდი „ქართული ოცნების“ წარმომადგენლების მიერ ევროპარლამენტისთვის გიგი უგულავას საქმეზე ფაქტების შემსწავლელი კომისიის შექმნაზე გაკეთებულ შეთავაზებას გამოეხმაურა. 

მისი თქმით, ამ შეთავაზებაზე პასუხის გაცემა ძალიან ნაადრევია, ვინაიდან ქართულმა მხარემ ინიციატივა ახლახან წარმოადგინა. „რა თქმა უნდა ძალიან ყურადღებით გავეცნობით ამ შეთავაზებას. როგორც იცით, ანგარიშის მოსამზადებლად მომხსენებელი სვენ მიქსერი მიემგზავრება საქართველოში. დღეს მეტი დეტალის მოწოდება არ შემიძლია“, - განაცხადა ტელეკომპანია „იმედთან“ საუბრისას მარინა კალიურანდიმ.  

მისი თქმით, ევროპარლამენტში ფაქტების დამდგენი კომისიის შექმნის პრაქტიკა არსებობს. „ბოლო მისია იყო მალტაზე. არის ფორმალური მისია და არის არაფორმალური მისია. შეიძლება ევროპარლამენტარების ჯგუფი ჩამოვიდეს საქართველოში და გამართონ შეხვედრა ოპოზიციასთან, სამოქალაქო სექტორთან, ხელისუფლებასთან. ამ შემთხვევაში ევროპარლამენტს სრული სურათი შეექმნება“, - აღნიშნა მარინა კალიურანდიმ.

საპარლამენტო ასოცირების საბჭოს თანათავმჯდომარის განცხადებით, ევროპარლამენტი საქართველოში მიმდინარე პროცესებს ყურადღებით აკვირდება. „ჩვენ მოვუწოდებთ მმართველ პარტიას და ოპოზიციას, დაიწყონ დიალოგი, შედგეს კონსენსუსი და გამოსავალი გამოიძებნოს. ქართველი ხალხი იმსახურებს სამართლიან არჩევნებს. 2020 წლის არჩევნები იქნება უმნიშვნელოვანესი თქვენი ქვეყნისთვის, ქართველი ხალხისთვის და ეს გადაწყვეტს თქვენს მომავალს, თქვენს ინტეგრაციას, რეფორმებს. ჩემი გზავნილია ოპოზიციის და მმართველი პარტიის მიმართ - ძალიან გთხოვთ ყველას, დასხედით ერთ მაგიდასთან, ისაუბრეთ და ესაუბრეთ ერთმანეთს. ეს არ ეხება თქვენს პარტიებს, ეს ეხება ქართველი ხალხის მომავალს“, - განაცხადა კალიურანდიმ.

„ქართული ოცნების“ წარმომადგენლებმა ევროპარალამენტს  გიგი უგულავას საქმეზე ფაქტების შემსწავლელი კომისიის შექმნა შესთავაზეს.

ევროპელი სოციალისტების პარტია მხარს უჭერს საქართველოში ევროპარლამენტარებისგან შემდგარი ფაქტების შემსწავლელი მისიის გაგზავნას, რომელიც უგულავას საქმეს შეისწავლის. ინფორმაცია ამის შესახებ პარტიის ოფიციალურ ვებგვერდზე გამოქვეყნდა. 

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.