ია მეტრეველი: შევეწირებით, რომ „ნაციონალური მოძრაობა“ არასდროს დაბრუნდეს ხელისუფლებაში

„ნაციონალური მოძრაობის“ მმართველობის პერიოდი საქართველოს ისტორიაში შევა როგორც ჯოჯოხეთის წლები“, - ამის შესახებ წინა ხელისუფლების დროს შვილმოკლულმა დედებმა დღეს გამართულ პრესკონფერენციაზე განაცხადეს.

მათ საზოგადოებას კიდევ ერთხელ შეახსენეს წინა ხელისუფლების დროს ჩადენილი დანაშაულები და აღნიშნეს, რომ მათი დევიზი იყო „ნულოვანი ტოლერანტობა“, „ესროლე“, „პირდაპირ ციხეში“. ბუტა რობაქიძის დედის თქმით, „ნაციონალური მოძრაობის“ დაბრუნების საფრთხეს ვერ ხედავენ, რადგანაც ხალხი მმართველი ძალის გვერდით არის და ყველას კარგად ახსოვს, თუ როგორი სისასტიკით ექცეოდნენ ისინი მოქალაქეებს.

შვილმოკლული მშობლები გიგი უგულავას საქმესაც გამოეხმაურნენ. მათი თქმით, დედაქალაქის ყოფილი მერი არის თაღლითი და კრიმინალი, შესაბამისად, ოპოზიციის მხრიდან ამ საქმის პოლიტიკურ ჭრილში გადაყვანა არის შეცდომა.

„ესენი არიან კრიმინალები. „ნაციონალური მოძრაობა“ სრულიად უდანაშაულო ადამიანებს ციხეში წამებით ხოცავდა, დღეს კიდევ გონორით გამოდიან და რამდენს ითხოვენ, ნაცვლად იმისა, რომ პასუხი აგონ თავის დროზე ჩადენილ დანაშაულებზე. მათი თავისუფლად ბოგინი არ შეიძლება! შევეწირებით იმას, რომ ისინი არასდროს დაბრუნდნენ ხელისუფლებაში. წარმოუდგენელ უბედურებაში ვიყავით, სისხლში ცურავდა მთელი საქართველო. როდესაც მიტინგებიდან იტაცებდნენ ხალხს, მაშინ არ მახსოვს არც ამერიკისა და კონგრესმენების მხარდაჭერა. კონგრესმენებს, რომლებიც დღეს „ნაციონალებს“ მხარს უჭერენ, თავის დროზე სააკაშვილი ფულს უხდიდა. დღესაც მოსყიდული ჰყავთ და ალაპარაკებენ. მივმართავ ხელისუფლებას, არ იყოს დამნაშავე „ნაციონალური მოძრაობის“ მიმართ ლოიალური და მათ წინააღმდეგ კანონის ფარგლებში მიიღონ შესაბამისი ზომები“, - განაცხადა ია მეტრეველმა.

მოკლული გიორგი გამცემლიძის დედა კი ამბობს, რომ „ნაცმოძრაობის“ რეჟიმმა ბევრი ადამიანი გაამწარა და მოვა დრო, როცა ყველა დაისვენებს მათგან. გულიკო გამცემლიძის განცხადებით, რომ არა „ნაციონალური მოძრაობა“, შესაძლებელი იქნებოდა თავისუფალ საქართველოში ცხოვრება.