გიორგი გახარია: გვაკრიტიკებენ და ამასთან ერთად აღნიშნავენ საქართველოს პროგრესს ბოლო წლების განმავლობაში

„ჩვენი მეგობრებისგან კრიტიკას აღვიქვამთ ნორმალურად. მაგრამ ჩვენც გვაქვს უფლება ჩვენი პოზიცია დავასაბუთოთ. სხვათა შორის დღეს ამას აქაც ვაკეთებ და გავაკეთებ“, - ამის შესახებ მედიასთან საქართველოს პრემიერ-მინისტრმა გიორგი გახარიამ მიუნხენის უსაფრთხოების კონფერენციის ფარგლებში გამართული შეხვედრების შემდეგ განაცხადა. 

მისი თქმით, ხელისუფლებას უფლება აქვს კრიტიკაზე თავისი პოზიცია დაასაბუთოს. „რაც მთავარია საქართველოს ჰყავს ძალიან ბევრი მეგობარი როგორც აშშ-ში, ასევე ევროპაში. ეს ის ხალხია, გარდა იმისა, რომ გვაკრიტიკებენ, ამასთან ერთად აღნიშნავენ საქართველოს პროგრესს ბოლო წლების განმავლობაში დემოკრატიზაციის თვალსაზრისით. ისიც უნდა აღვნიშნოთ, რომ სამწუხაროდ, არჩევნების წელია,  ხშირად ხდება, რომ პოლიტიკური ძალები ყველა ინსტრუმენტს იყენებენ, თუნდაც ქვეყნის საგარეო მიმართულების კომპონენტის ჩართვას შიდაპოლიტიკურ და საარჩევნო პროცესებში. სამწუხაროდ, ეს არის ახლა გამწვავებულ ფაზაში“, - განაცხადა გიორგი გახარიამ.

მისი თქმით, ყველა სამართლიანი კრიტიკა შესაბამისად შეფასდება. „ყველა უსაფუძვლო კრიტიკას გაეცემა დასაბუთებული, ობიექტური პასუხი. ეს იქნება ჩვენი ყოველდღიური შრომა. არავის ეგონოს, რომ ჩვენ სადმე ჩავალთ, ერთხელ პასუხს გავცემთ და ამას დავივიწყებთ, არა, ჩვენ ვიშრომებთ ამისთვის ყოველდღე“, - აღნიშნა გახარიამ.