გია ვოლსკიმ ოპოზიციას „სკუნსთა მოდგმა“ უწოდა

პარლამენტის ვიცე-სპიკერმა გია ვოლსკიმ ოპოზიციის პერფორმანსები გააკრიტიკა. მისი თქმით, საერთაშორისო ექსპერტებიც აღიარებენ, რომ მიხეილ სააკაშვილის მთავრობამ რუსეთს საქართველოს დიდი ნაწილი ჩააბარა. 

„ესეთი უნიჭო პერფორმანსები ახალი არ არის მათი მხრიდან. საგანგებოდ მინდა კიდევ ერთხელ განვაცხადო: ყველანაირი შეფასებით, მათ შორის საერთაშორისო ექსპერტების მიერ, სააკაშვილმა, იმ ხელისუფლებამ, რომელსაც ეს ხალხი ემსახურება და მათი სახელით ამ უნიჭო და სულელურ პერფორმანსებს მართავს, ჩააბარეს რუსეთს საქართველოს დიდი ნაწილი. კიდევ კარგი, დღეს მხოლოდ აი ეს სასტვენი და ზოგიერთი ტელევიზიის მიკროფონი აქვთ იარაღად და კიდევ მეგაფონები“, - აღნიშნა ვოლსკიმ. 

მისი თქმით, ნებისმიერი პოლიტიკური ძალა, ვინც მათ გვერდით დგას, საქართველოს ოკუპიაციის საკითხზე პასუხისმგებლობას იზიარებს.

„თუ ვინმეს ნიშნის მოგებით უნდა ისაუბროს ან რუსეთთან ურთიერობაზე ან ქართული ინტერესების დათმობაზე, ნამდვილად არ არიან ის პოლიტიკური ძალები, რომლებიც მეგაფონების გარშემო არიან გაერთიანებული და პირში ეს სასტვენები უდევთ და ამ ტელე მიკროფონებით დასდევენ ხალხს. ესენი არიან ზონდერები, რომლებმაც თავის დროზე ჩაიდინეს მძიმე დანაშაული. გარდა ამისა, თუკი ხატოვნად ვიტყვით, ეს არის რაღაც სკუნსთა მოდგმა. მათ არა მარტო მეგაფონით გვიყვირეს, არამედ საშინელი სუნი დააყენეს და შემდეგ გავიდნენ დარბაზიდან. ახლა მეგაფონებით შემოვარდნენ. აი ეს არის მათი სახე, მაგრამ ამის უკან კიდევ უფრო სერიოზული დანაშაულები დევს, რასაც ჰქვია სახელმწიფო ეროვნული ინტერესების გაყიდვა პირად ინტერესებზე“, - განაცხადა გია ვოლსკიმ

18 თებერვალს ოპოზიციამ არჩილ თალაკვაძეს ყოველწლიური ანგარიშის წარდგენა რამდენიმე წუთით, საბჭოთა კავშირის ჰიმნის გაჟღერებით შეაწყვეტინა. 12 დეკემბერს კი პარლამენტის პლენარულ სხდომაზე ირაკლი კობახიძემ განაცხადა, რომ სხდომათა დარბაზში ორი დეპუტატი შევიდა და დარბაზში გარკვეული ნივთიერება დაასხა. ამის გამო მან, უსაფრთხოების ნორმებიდან გამომდინარე, სხდომაზე ტექნიკური შესვენება გამოაცხადა. დეპუტატების თქმით, დარბაზში სუნი მას შემდეგ დადგა, რაც იქ ირმა ნადირაშვილი და ლელა ქებურია გამოჩნდნენ.