მიხეილ სააკაშვილი: ვამაყობ ვანო მერაბიშვილის შემართებით და სიმტკიცით, ყველას შერიგებისკენ მოვუწოდებ

საქართველოს ყოფილი პრეზიდენტი, მიხეილ სააკაშვილი ვანო მერაბიშვილის გათავისუფლებას Facebook-ის პირად გვერდზე ეხმაურება. 

„მივესალმები ვანო მერაბიშვილის თავისუფლებაზე ყოფნას, მრავალწლიანი უდანაშაულოდ პატიმრობის შემდეგ. მე ვამაყობ მისი გაუტეხლობით, შემართებით და სიმტკიცით. ვეთანხმები, რომ ივანიშვილი აუცილებლად დასრულდება. დასრულდება არა ჩვენი პირადი გრძნობების გამო, არამედ იმიტომ, რომ როგორც ვანომ თქვა, ჩვენ ქვეყანას სჭირდება წინსვლა და განვითარება. მოვუწოდებ ყველას შერიგებისკენ, არა წარსულისკენ, არამედ მომავლისკენ სწორებისკენ“, - წერს მიხეილ სააკაშვილი. 

„ზუსტად 9 წელი და 6 თვე ვიყავი ამ საპატიმროში, სამარტოო საკანში, კმაყოფილი ვარ იმით, რომ არ წავედი კომპრომისზე, უპირველეს ყოვლისა, ჩემი საკუთარი თავის წინაშე“, - ეს არის პირველი სიტყვები, რომელიც ექსპრემიერმა და შინაგან საქმეთა ყოფილმა მინისტრმა, ვანო მერაბიშვილმა ე.წ. მატროსოვის ციხის დატოვების შემდეგ თქვა.

ვანო მერაბიშვილი როდესაც ჩასვეს, ასეთი iPhone არ არსებობდა, მსოფლიო სხვა იყო, ამიტომ მის ადგილზე ოჯახს დავუბრუნდებოდი, - ამის შესახებ საქართველოს ყოფილმა პრეზიდენტმა, მიხეილ სააკაშვილმა „მთავარ არხთან“ საუბარში 10 თებერვალს განაცხადა კითხვაზე, უხელმძღვანელებს თუ არა მის პირად შტაბს ვანო მერაბიშვილი ციხიდან გამოსვლის შემდეგ. ექსპრეზიდენტის თქმით, შტაბს თავად უხელმძღვანელებს. „ვანო მერაბიშვილის ადგილზე ოჯახს დავუბრუნდებოდი და მსოფლიოში ვიმოგზაურებდი“, - აღნიშნა მიხეილ სააკაშვილმა. 

თითქმის 7-წლიანი პატიმრობის შემდეგ ექსპრემიერმა და შინაგან საქმეთა ყოფილმა მინისტრმა, ვანო მერაბიშვილმა ე.წ. მატროსოვის ციხე დატოვა. საპატიმროსთან მას მხარდამჭერები დახვდნენ.

2013 წელს დაკავებული შინაგან საქმეთა ყოფილი მინისტრი სასჯელს რამდენიმე საქმეზე იხდიდა, მათ შორის, 2011 წლის 26 მაისის აქციის დარბევის, სანდრო გირგვლიანის საქმეზე მტკიცებულებების დამალვის, ვალერი გელაშვილის მიმართ ფიზიკური ანგარიშსწორების, კვარიათის აგარაკისა და ამომრჩევლის მოსყიდვის საქმეებზე. 7 ნოემბრის აქციის დარბევისა და „ტელეიმედში“ შეჭრის საქმეების განხილვა ამ დრომდე გრძელდება და ბრალდების რიგით მეექვსე საქმეზე განაჩენი მალევე უნდა გამოცხადდეს.