გედევან ფოფხაძე: არჩევნების 100/50-ის პრინციპით ჩატარებასაც მივცემ ხმას

დამოუკიდებელი დეპუტატი გედევან ფოფხაძე მმართველ გუნდს მოუწოდებს, საარჩევნო კოდექსში ცვლილება მარტის პირველ რიცხვებში დაარეგისტრიროს. 

გედევან ფოფხაძემ მედიაცენტრ „მთავარში“ გამართულ პრესკონფერენციაზე განაცხადა, რომ ცვლილების ინიციატორი ხელისუფლება უნდა იყოს და „ქართულ ოცნებაზეა“ დამოკიდებული, ქვეყანა ესკალაციამდე მივა, თუ ნორმალურ არჩევნებს ჩაატარებს.

„შერეული სისტემის გარდა სხვა მოდელი ამ ეტაპზე გამორიცხულია, თუ ხელისუფლებას აქვს სურვილი, რომ რაიმე სახის კომპრომისი გამონახოს, მარტის პირველივე რიცხვებში უნდა დაარეგისტრიროს ცვლილება საარჩევნო კოდექსში, ესაა საჯარო გზავნილი მათი მისამართით. მთავარია, დიალოგის დაწყება და შეთანხმება, თუ ხელისუფლება ამაზე არ წავა, გამოდის, რომ თავად სურს ქვეყანაში ქაოსი“, - განაცხადა გედევან ფოფხაძემ. 

მისივე თქმით, „პირველი ნაბიჯი „ქართულმა ოცნებამ“ უნდა გადადგას.

„ხელისუფლებასთან ულტიმატუმებით საუბარს არ ვაპირებთ. ჩვენი ამოცანაა, გადაწყვეტილება იყოს მიღებული. ამიტომ, კომპრომისულ ვარიანტს მხარს დავუჭერთ, მაგრამ ეს კომპრომისული ვარიანტი უნდა ითვალისწინებდეს კონსენსუსის მაღალ ხარისხს. მე 100/50-საც მივცემ ხმას“, - აღნიშნა დეპუტატმა. 

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

ხელისუფლებამ ოპონენტებს შერეულ საარჩევნო მოდელი 100/50 2019 წლის დეკემბერში შესთავაზა. ეს საარჩევნო მოდელი გულისხმობს პროპორციული წესით 100 დეპუტატის არჩევას, ნაცვლად 77-ისა, ხოლო მაჟორიტარული მანდატები 50-მდე შემცირდება. 

იმ შემთხვევაში, თუ პოზიციები არ შეიცვლება, 2020 წლის საპარლამენტო არჩევნები მოქმედი მოდელით ჩატარდება: 77 პროპორციული და 73 მაჟორიტარული.