მამუკა მდინარაძე ოპოზიციაზე: ისინი შიგნიდან გვიტევენ, რუსები - გარედან და რეალურად რუსულ საქმეს აკეთებენ

თვალსაჩინო იყო გიგა ბოკერიას მიდგომა პოლიტმატიმრების ცნების მიმართ, რასაც სხვებიც იზიარებენ, - ამის შესახებ საპარლამენტო უმრავლესობის ლიდერმა, მამუკა მდინარაძემ ჟურნალისტებს განუცხადა.

მისი თქმით, პოლიტპატიმრობის მათი ფორმულა ასეთია: თუ დანაშაული ჩაიდინე 2003-2012 წლებში, იქნება ეს მკვლელობა, მკვლელობის შეკვეთა, 50 მილიონამდე თანხის გაფლანგვა თუ სხვა რამ, ყველა შემთხვევაში პოლიტპატიმარი ხარ და მთელმა მსოფლიომ ეს მოცემულობად უნდა მიიღოს.

მდინარაძის განცხადებით, ოპოზიცია მიიჩნევს, რომ ნებისმიერი დანაშაულის ჩადენის მიუხედავად, ისინი პოლიტპატიმრები არიან. უმრავლესობის ლიდერი აცხადებს, რომ ბოკერიას სტანდარტი არ მოქმედებს არც საზოგადოებაში და არც ქვეყნის გარეთ, უცხოელებში. მისივე თქმით, არავინ დაიჯერებს და პოლიტპატიმარს არავინ დაარქმევს ადამიანს, რომელსაც უმძიმესი დანაშაულები აქვს ჩადენილი. 

უმრავლესობის ლიდერი ციხის დატოვების შემდეგ ვანო მერაბიშვილის მიერ გაჟღერებულ გზავნილსაც გამოეხმაურა. მისი თქმით, ხელისუფლების დამხობის შესახებ მერაბიშვილის განცხადება „აღიარებების სერიის გაგრძელებაა“.

„რაც შეეხება მის გზავნილებს, ეს ახალი ამბავი არ არის. მიხეილ სააკაშვილმა ხომ აღიარა, შანსი ვერ გამოვიყენეთ, ხელისუფლება ემხობოდაო. მერე მელიამ აღიარა, ცოტა დაგვაკლდა და შევდიოდითო. მერაბიშვილის განცხადებებიც არის ამ აღიარებების სერიის გაგრძელება. ახალი და განსაკუთრებული არაფერი ხდება. ისინი საუბრობენ დამხობაზე, მათთვის საბჭოთა ჰიმნი პარლამენტში პრობლემა არ არის, ბოლოს შეიძლება თქვან, რომ 2008 წელიც გარკვეული ხუმრობა იყო რუსეთის მხრიდან. ისინი შიგნიდან გვიტევენ, რუსები - გარედან და რეალურად რუსულ საქმეს აკეთებენ", - განაცხადა მდინარაძემ.