დავით უსუფაშვილი: ვანო მერაბიშვილთან არც სალაპარაკო მაქვს რამე და არც მოსალაპარაკებელი

„შენების მოძრაობის“ ლიდერმა, დავით უსუფაშვილმა ექსპრემიერ და შინაგან საქმეთა ყოფილ მინისტრ, ვანო მერაბიშვილთან შესაძლო თანამშრომლობის შესახებ დასმულ შეკითხვას უპასუხა.

დავით უსუფაშვილმა ჟურნალისტებს განუცხადა, რომ ვანო მერაბიშვილთან არც სალაპარაკო აქვს რამე და არც მოსალაპარაკებელი. 

„შალვას ოთკუთხედი მაგიდის გარშემო ვინც ვსხედვართ, უმეტესობა კონკურენტები ვართ და ხვალაც კონკურენტები ვიქნებით, მე იქ არავინ შემირჩევია, ვინ მომწონს და ვინ არ მომწონს. აქ ჩვენ პრობლემები არ შეგვიქმნია და არც შევქმნით, მაგრამ მე პირადად, ვანო მერაბიშვილთან არც სალაპარაკო მაქვს და არც მოსალაპარაკებელი. ახლა არის დანაშაულისთვის სასჯელმოხდილი მოქალაქე, რომელსაც აქვს სრული თავისუფლება აკეთოს ის, რაც მოუნდება“, - განუცხადა ჟურნალისტებს დავით უსუფაშვილმა.

ვანო მერაბიშვილმა სასჯელაღსრულების დაწესებულება 20 თებერვალს დატოვა.

შინაგან საქმეთა ყოფილი მინისტრი სასჯელს რამდენიმე საქმეზე იხდიდა, მათ შორის, 2011 წლის 26 მაისის აქციის დარბევის, სანდრო გირგვლიანის საქმეზე მტკიცებულებების დამალვის, ვალერი გელაშვილის მიმართ ფიზიკური ანგარიშსწორების, კვარიათის აგარაკისა და ამომრჩევლის მოსყიდვის საქმეებზე. 

7 ნოემბრის აქციის დარბევისა და „ტელეიმედში“ შეჭრის საქმეების განხილვა ამ დრომდე გრძელდება და ბრალდების რიგით მეექვსე საქმეზე განაჩენი მალევე უნდა გამოცხადდეს.

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.