ირაკლი სესიაშვილი ნატოში ინტეგრაციაზე: თითოეული აგურის დადებას მივყავართ იქამდე, რომ კედლებზე სახურავიც უნდა აშენდეს

თითოეული აგურის დადებას მივყავართ იქამდე, რომ კედლებზე სახურავიც უნდა აშენდეს. თურქეთის განცხადებები, აშშ-ის მტკიცე მხარდაჭერა, ბალტიის ქვეყნებისა და აღმოსავლეთ ევროპის თანადგომა საბოლოო ჯამში ახდენს კონსოლიდაციას საერთო მიზნის გარშემო, - ამის შესახებ გადაცემაში „დღის ქრონიკა“ პარლამენტის თავდაცვისა და უსაფრთხოების კომიტეტის თავმჯდომარემ, ირაკლი სესიაშვილმა განაცხადა.

„ჩვენ არასაკმარისად ვაფასებთ შავი ზღვის უსაფრთხოების მნიშვნელობას. როდესაც ვამბობთ, რომ შავი ზღვის კომპონენტი დასავლეთსა და აღმოსავლეთს ურთიერთობაში ერთ-ერთი გადამწყვეტია, როგორც ეკონომიკური თვალსაზრისით, ასევე უსაფრთხოების ნაწილში, აუცილებელია დავინახოთ შორეული პერსპექტივები. ექსპერტული წრეები ამ საკითხს სულ უფრო დიდ ყურადღებას ანიჭებენ. შავი ზღვის მიმართულებით დასავლეთის კონცენტრირება არის ერთ-ერთი დამატებითი მექანიზმი ევროპაში და მსოფლიოში მშვიდობის უზრუნველსაყოფად. როდესაც თურქეთი, როგორც შავ ზღვაზე ერთ-ერთი ყველაზე ძლიერი მოთამაშე, საუბრობს ნატოსთვის საქართველოს მნიშვნელობაზე, ეს ძალიან დასაფასებელია. საქართველოს ალიანსში გაწევრიანების მიმართულებით სკეპტიციზმი ყოველთვის რაღაც მიზეზებს ეფუძნებოდა და ეს მიზეზები ახლაც არსებობს, მაგრამ ჩვენმა ქვეყანამ უნდა მოუტანოს სარგებელი ნატოს, ისევე როგორც ნატომ უნდა მოგვცეს სარგებელი ჩვენ, და ეს საკითხი სულ უფრო აქტუალური ხდება. ჩვენ ვხედავთ, რა ხდება სირიაში, ირანში, ახლო აღმოსავლეთში, ამიტომ რაც უფრო დიდი იქნება ევროატლანტიკური ოჯახი, უსაფრთხოების ხარისხი უფრო ამაღლდება“, - აცხადებს  სესიაშვილი.

მისივე თქმით, რუსეთის აგრესია ყირიმსა და აფხაზეთში ზოგადად ტერიტორიის გაფართოებასთან ერთად ასევე ზღვაზე გასასვლელსაც უკავშირდებოდა, ამიტომ აუცილებელია კონტრზომების მიღება.

„თითოეული აგურის დადებას მივყავართ იქამდე, რომ კედლებზე სახურავიც უნდა აშენდეს. თურქეთის განცხადებები, აშშ-ის მტკიცე მხარდაჭერა, ბალტიის ქვეყნებისა და აღმოსავლეთ ევროპის თანადგომა საბოლოო ჯამში ახდენს კონსოლიდაციას საერთო მიზნის გარშემო. იყო დრო, როდესაც ჩვენ გვეუბნებოდნენ, რომ ჯერ ესა თუ ის გამოცდა უნდა ჩავაბაროთ. ახლა გამოცდა კი არა, შეიძლება ითქვას, რომ აკადემიაში ვსწავლობთ უკვე და გვინდა სრულუფლებიანი წევრობა. ჩვენთვის ნატოში გაწევრიანება მხოლოდ უსაფრთხოების კომპონენტს არ ეხება. როგორც კი საქართველო ალიანსის წევრი გახდება, ეს იქნება სიგნალი ინვესტორებისთვის და ბიზნესმენებისთვის, რომ ეს ქვეყანა უსაფრთხოა და მასში ინვესტიციის სახით ჩადებული თითოეული დოლარი იქნება დაცული“, - განაცხადა სესიაშვილმა.

გიორგი გახარიას სტატია სახელწოდებით „საქართველო იმსახურებს ნატოში გაწევრიანებას“ Washington Times-ში დღეს გამოქვეყნდა. მასში საქართველოს პრემიერი აღნიშნავს, რომ მეტი საქართველო ნატოში და მეტი ნატო საქართველოში გააძლიერებს შავი ზღვის და დასავლეთის უსაფრთხოებას, ასევე საქართველოს დემოკრატიას და მზარდ ეკონომიკას.