ამირან გამყრელიძე: ინფიცირებულ პაციენტს საქართველოში კონტაქტი მხოლოდ სპეციალურად ეკიპირებულ სამედიცინო პერსონალთან ჰქონდა

კორონავირუსით ინფიცირებულ 50 წლამდე კაცს ჰქონდა გარკვეული კონტაქტები აზერბაიჯანის ტერიტორიაზე იმ ადამიანებთან, ვისთან ერთადაც სამარშრუტო ტაქსით მგზავრობდა, ხოლო რაც შეეხება საქართველოს ტერიტორიას, აქ პაციენტს კონტაქტი ჰქონდა მხოლოდ სპეციალურად ეკიპირებულ სამედიცინო პერსონალთან, - ამის შესახებ „ქრონიკასთან“ საუბარში დაავადებათა კონტროლის ცენტრის ხელმძღვანელმა, ამირან გამყრელიძემ განაცხადა.

„ყველამ იცის, რომ გლობალურად სიტუაცია სერიოზული. ბოლო ერთი კვირაა, ყველა ქვეყანაში პანდემიური მზადება მიმდინარეობს, რადგან გარდა ჩინეთისა, 1000-ზე მეტი შემთხვევა დაფიქსირდა სამხრეთ კორეაში, რამდენიმე ასეული შემთხვევაა იტალიაში, ასევე ირანში, სინგაპურში და კიდევ 36 ქვეყანაში. ევროპის ქვეყნებში, ძირითადად, ეს ერთეული შემთხვევებია. როდესაც ირანში დაფიქსირდა პირველი შემთხვევა, ჩვენ პანდემიური მზადყოფნის თამასა ავწიეთ, ვინაიდან ირანი ჩვენი მომიჯნავე ქვეყანაა, რომელთანაც გვქონდა ინტენსიური მიმოსვლა და ბიზნესურთიერთობები. ჩვენ არაერთხელ ვთქვით ბრიფინგებზე, რომ ამ ეტაპზე უფრო მეტ საფრთხეს ინფექციის შემოტანის მხრივ წარმოადგენდა ირანი, და არა ჩინეთი.

თუმცა ეს შემთხვევა სწრაფად იყო იდენტიფიცირებული, ადამიანი მოათავსეს ბოქსირებულ განყოფილებაში, ინტენსიურად ტარდება მისი კონტაქტების მოკვლევა, თუ როგორ იმოგზაურა მან, სანამ საქართველოში ჩამოვიდა. ჩვენ ვალდებულები ვართ, შევატყობინოთ ჯანდაცვის მსოფლიო ორგანიზაციას ამ ფაქტის შესახებ. დღესვე დავუკავშირდებით აზერბაიჯანელ კოლეგებსაც, რათა მათაც დაიწყონ იმ ადამიანების შემოწმება, ვისთან ერთადაც საქართველოს მოქალაქე მგზავრობდა. მას ჰქონდა გარკვეული კონტაქტი საბაჟოს გასვლის დროს და ყველა ეს ადამიანი იდენტიფიცირდება სასაზღვრო სამსახურის ეპიდემიოლოგიური სამსახურების მიერ. ამ ადამიანებს შესაბამისი პრევენციული ღონისძიებები ჩაუტარდებათ. მას ჰქონდა გარკვეული კონტაქტები აზერბაიჯანის ტერიტორიაზე იმ ადამიანებთან, ვისთანაც ერთად სამარშრუტო ტაქსით მგზავრობდა. რაც შეეხება საქართველოს ტერიტორიას, პაციენტს კონტაქტი ჰქონდა მხოლოდ სპეციალურად ეკიპირებულ სამედიცინო პერსონალთან.

გლობალური პანდემიის საფრთხე რეალურია, ეს ნიშნავს არა მხოლოდ საზღვრების დაცვას და ინფექციის შემოტანის პრევენციას, არამედ მზად ვიყოთ იმისთვის, ვირუსის დადასტურების შემთხვევაში ადამიანს სწრაფად ვუმკურნალოთ და მინიმუმამდე დავიყვანოთ მძიმედ მიმდინარე შემთხვევები“, - აცხადებს გამყრელიძე.

საქართველოში კორონავირუსის პირველი შემთხვევა დადასტურდა. ჯანდაცვის მინისტრის, ეკატერინე ტიკარაძის თქმით, დაავადებული საქართველოს მოქალაქეა, რომელიც გუშინ აზერბაიჯანის გავლით ირანიდან შემოვიდა. საუბარია 50 წლის კაცზე. პაციენტი ინფექციურ საავადმყოფოშია გადაყვანილი და მის სიცოცხლეს საფრთხე არ ემუქრება.

ჯანმომ დღეს განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.