ამირან გამყრელიძე: სააღმზრდელო და სასწავლო პროცესის შეჩერების რეკომენდაციას ამ ეტაპზე არ ვიძლევით

„ჩვენ ამ ეტაპზე საბავშვო ბაღებთან და სკოლებთან დაკავშირებით სააღმზრდელო ან სასწავლო პროცესის შეწყვეტასთან დაკავშირებით რეკომენდაციას არ ვიძლევით“, - ამის შესახებ დაავადებათა კონტროლის ცენტრის ხელმძღვანელმა, ამირან გამყრელიძემ განაცხადა.

მისივე თქმით, მათი რეკომენდაციაა სასწავლო პროცესში ჰიგიენის საკითხების დაცვა. ასევე, გამყრელიძემ მოუწოდა მოქალაქეებს, თავი შეიკავონ სტიგმატიზებული ან დისკრიმინაციული მიდგომებისგან იმ პირების მიმართ, რომლებიც კორონავირუსით ინფიცირებულ ქვეყნებში იმყოფებოდნენ.

„საბავშვო ბაღებთან და სკოლებთან დაკავშირებით ჩვენ ამ ეტაპზე არ ვიძლევი რეკომენდაციას სააღმზრდელო ან სასწავლო პროცესის შეწყვეტასთან დაკავშირებით. ვიძლევით მხოლოდ რეკომენდაციას მაქსიმალურად გავაინტენსიუროთ საზოგადოებრივი ჰიგიენის საკითხები სასწავლო და სააღმზრდელო დაწესებულებებში. ასევე, ცოტა უხერხულ საკითხს მინდა შევეხო. მაქვს ინფორმაცია, რომ სააღმზრდელო და სასწავლო დაწესებულებაში ადგილი აქვს დისკრიმინაციულ მიდგომას იტალიაში მოგზაურობიდან ჩამოსულ ბავშვებთან და მის ოჯახის წევრებთან დაკავშირებით. დაუშვებელია, რომ ჩვენ სადმე გვქონდეს სტიგმატიზებული ან დისკრიმინაციული მიდგომა იმ ადამიანების მიმართ, რომლებსაც აქვთ ისტორია იტალიაში, სინგაპურში, კორეაში, თუ სხვა ქვეყნებში მოგზაურობის“, - განაცხადა გამყრელიძემ.

გასული დღე-ღამის განმავლობაში, ჩინეთში დაავადებამ 44 ადამიანი იმსხვერპლა. საერთო ჯამში კი გარდაცვლილთა რაოდენობამ 2 788-ს მიაღწია. ინფიცირებულთა რიცხვი კი 78 832-ს შეადგენს.

2022-მდე გაიზარდა დაავადებულთა რაოდენობა სამხრეთ კორეაში. იქ ვირუსით 13 ადამიანი გარდაიცვალა. ქვეყნის დაავადების კონტროლისა და პრევენციის ცენტრის ცნობით, ბოლო 24 საათის განმავლობაში ვირუსით გარდაცვალების ახალი შემთხვევა არ დადასტურებულა.

მსოფლიო მასშტაბით, ვირუსი უკვე 54 ქვეყანაშია გავრცელებული, სადაც გარდაცვლილთა რაოდენობამ 70-ს მიაღწია. 83 ათას 379 ინფიცირებულიდან გამოჯანმრთელებული კი 36 ათას 533-ია.

საქართველოში კორონავირუსის პირველი შემთხვევა დადასტურდა. ჯანდაცვის მინისტრის, ეკატერინე ტიკარაძის თქმით, დაავადებული საქართველოს მოქალაქეა, რომელიც 26 თებერვალს აზერბაიჯანის გავლით ირანიდან შემოვიდა. საუბარია 50 წლის კაცზე. პაციენტი ინფექციურ საავადმყოფოშია გადაყვანილი და მის სიცოცხლეს საფრთხე არ ემუქრება.

26 თებერვალს ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.