თეა წულუკიანი: დეპორტირებულების საქმეზე რუსეთის მიერ კომპენსაციის გადახდა სავალდებულოა და ამ თანხას ერიცხება პროცენტები

რუსეთთან ე.წ. დეპორტირებულების საქმეზე ჩვენს არგუმენტებს მინისტრთა კომიტეტი ყოველ ჯერზე იზიარებს და გამოსცემს საქართველოს არგუმენტების შესაბამის რეზოლუციას, სადაც ახსენებს რუსეთს, რომ არავითარი საბაბი არ იქნება გაზიარებული და კომპენსაციის გადახდა უპირობოდ სავალდებულოა და ამ თანხას ერიცხება პროცენტები, - ამის შესახებ ე.წ. დეპორტირებულების საქმესთან დაკავშირებით იუსტიციის მინისტრმა თეა წულუკიანმა განაცხადა.

„ჩვენ გვახსოვს, რომ რუსეთთან ე.წ. დეპორტირებულების საქმეზე დავიწყეთ დავა იქიდან, რომ რუსეთი ამბობდა − საერთოდ დეპორტაციას და ჩვენი მოქალაქეების კოლექტიურ გამოძევებას ადგილი არ ჰქონია და არც უკანონო პატიმრობები ყოფილა სახეზე. ჩვენ ეს დავა მრავალი წლის პროცედურული, სხვადასხვა პერიპეტიის შემდეგ სტრასბურგის სასამართლოს წინაშე მოვიგეთ. თავიდან სია იყო წარდგენილი ძალიან მცირე, რადგან ჩვენ, საქართველოს ხელისუფლება, ვთვლიდით, რომ შეიძლებოდა, უბრალოდ, საილუსტრაციო სიის საფუძველზე დადგენილიყო დარღვევები, თუმცა, შემდეგ შევხედეთ, რომ რუსეთს შეეძლო, ამით ესარგებლა და, სირთულეების მიუხედავად, შევქმენით სრულყოფილი სია და წარვადგინეთ ასობით ადამიანის კონკრეტული სია.

რა თქმა უნდა, ამან დაასუსტა რუსეთის პოზიციები და ამის წყალობით ჩვენ სტრასბურგის სასამართლოში დავა მოვიგეთ. დავაზე გადაწყვეტილება საბოლოოა, გასაჩივრებას არ ექვემდებარება და რუსეთი უკვე მინისტრთა კომიტეტის წინაშე უკვე ეჭვქვეშ აყენებს ამ სასამართლო გადაწყვეტილების აღსრულების საკითხს და ყველაფერს აკეთებს პროცედურულად იმისთვის, რომ 10 მლნ ევროს ოდენობის თანხა საქართველოს არ ჩაურიცხოს. მას მხოლოდ ერთადერთი არგუმენტი დარჩა, რომელიც აბსოლუტურად უსაფუძვლოა. რუსეთი ამბობს, რომ 10 მლნ ევრო საქართველოს კი არ უნდა ჩაურიცხოს, არამედ საქართველომ უნდა თქვას, ვისზე განაწილდება ეს თანხა. ჩვენ მიერ წარდგენილ სიაზე ის ამბობს, რომ ეჭვი ეპარება, რომ იქ ზოგიერთი ადამიანი არის მსხვერპლი, რომ ნამდვილად ეს თანხაა გადასახდელი და ა.შ.

კარგია, რომ ყოველ ჯერზე მინისტრთა კომიტეტზე ჩვენ ვითხოვთ საჯარო დებატებს და განხილვებს და ეს ჩვენი მოთხოვნა კმაყოფილდება. სულ რამდენიმე დღის წინათ მინისტრთა კომიტეტმა რუსეთს შეახსენა, რომ მისი ეს ვალდებულება გადახდასთან დაკავშირებით არის უპირობო. ის ვერავითარ პირობას − რომ გვარი არ მოსწონს, სახელი არ მოსწონს, სიის ოდენობა არ აკმაყოფილებს − ვერ დააყენებს და კიდევ ერთხელ მოუწოდა ევროსაბჭოს მინისტრთა კომიტეტმა, რომ ეს თანხა რაც შეიძლება მოკლე ვადაში ჩარიცხოს; თანხა, რომელსაც დიდი ხანია, უკვე ერიცხება პროცენტები პირგასამტეხლოს სახით, რადგან, როგორც იცით, როდესაც მოპასუხე არ ჩარიცხავს თანხას, ეს თანხა საგრძნობლად იზრდება. ჩვენ ყოველ ჯერზე მინისტრთა კომიტეტის ფარგლებში, როდესაც რუსეთი ერთსა და იმავე არგუმენტს აყენებს − რომ მას სჭირდება სია, ჩვენ ვეუბნებით, რომ ეს სია არსებობს. ჩვენს არგუმენტს მინისტრთა კომიტეტი ყოველ ჯერზე იზიარებს და გამოსცემს საქართველოს არგუმენტების შესაბამის რეზოლუციას, სადაც ახსენებს რუსეთს, რომ არავითარი საბაბი არ იქნება გაზიარებული და რომ უპირობო ვალდებულებაა ამ თანხის ჩარიცხვის, რომელსაც, როგორც უკვე გითხარით, ერიცხება პროცენტები.

ალბათ, ძნელი მისახვედრი არ არის, რომ ჯერ რუსეთს დავის წაგება არ უნდოდა, არც იმის აღიარება უნდოდა, რომ დარღვევები იყო ჩადენილი ჩვენს მოქალაქეებთან მიმართებით და ახლა არ უნდა, თანხა ჩარიცხოს და იყოს წაგებულის პოზიციაში. სხვა ახსნა ამას, უბრალოდ, არ აქვს. გასაკვირი აქ, ალბათ, არაფერია, როდესაც ამ ქვეყანას ოკუპირებული აქვს ჩვენი ტერიტორიები. თანხაზე საუბარი მას არ სურს, მითუმეტეს, რომ რუსეთის წინააღმდეგ ჩვენ აგვისტოს ომის საქმეზე სტრასბურგიდან წელს უკვე ველოდებით გადაწყვეტილებას“, - განაცხადა იუსტიციის მინისტრმა.

27 თებერვალს რუსეთის იუსტიციის სამინისტრომ სამოქმედო გეგმა წარადგინა, რომელშიც 2006 წელს რუსეთიდან გამოძევებული საქართველოს მოქალაქეებისათვის კომპენსაციის გადახდის პირობებია გაწერილი.

გადაწყვეტილება რუსეთიდან დეპორტირებული საქართველოს მოქალაქეებისთვის კომპენსაციის შესახებ სტრასბურგის ადამიანის უფლებათა ევროპული სასამართლოს დიდმა პალატამ 2019 წლის 31 იანვარს მიიღო, რომლის თანახმადაც რუსეთმა საქართველოს 1500 მოქალაქეს არამატერიალური ზიანის მიყენებისთვის 10 მილიონი ევრო უნდა გადაუხადოს.