გუბერნატორი ბორჯომის მაღალჩინოსნების დაკავებაზე: ჩვენი პოლიტიკური გუნდისთვის არ არსებობენ პრივილეგირებული თანამდებობის პირები

სამცხე-ჯავახეთის გუბერნატორი ბესიკ ამირანაშვილი ქრთამის აღების ფაქტზე ბორჯომის მუნიციპალიტეტის საკრებულოს თავმჯდომარის და ბორჯომის მერის დაკავების ფაქტს გამოეხმაურა.

ბესო ამირანაშვილი (სამცხე-ჯავახეთის გუბერნატორი) ბორჯომში დაკავებულებზე

„სამწუხარო ფაქტია, ადამიანურად მიმძიმს კიდეც კომენტარის გაკეთება, მაგრამ მინდა ხაზგასმით ავღნიშნო, რომ ჩვენი პოლიტიკური გუნდისთვის არ არსებობს პრივილეგირებული თანამდებობის პირები და ყველა პოლიტიკური თანამდებობის თუ თანამდებობის პირი, რომელიც სავარაუდო დანაშაულს ჩაიდენს მათ მიმართ იქნება კანონით შესაბამისი ღონისძიებები გატარებული.

მუნიციპალიტეტის მერთან ყოველდღიური და ინტენსიური კომუნიკაცია მქონდა. იგი ჩვენი პოლიტიკური გუნდის „ქართული ოცნების“ წევრია. რაც შეეხება საკრებულოს თავმჯდომარეს, ის ოპოზიციური პოლიტიკური გუნდის „პატრიოტთა ალიანსის“ წევრია.

ბორჯომის მუნიციპალიტეტი ტურისტულად საკმაოდ დატვირთულია, ასევე ბევრი ინფრასტრუქტურული პროექტი ხორციელდება და კონკრეტულად ჩემთვის ამ ეტაპზე უცნობია რომელ მშენებლობაზეა საუბარი.

დაახლოებით ორი წელია რაც გუბერნატორი ვარ და მსგავსი დანაშაული პირველია. ნებისმიერ დანაშაულზე თუ კორუფციულ ქმედებაზე რეგიონში შესაბამისი რეაგირება ხდება და ხდებოდა. მათ შორის ბოლო თვეების განმავლობაში.

რეგიონში ბოლო წლების განმავლობაში საკმაოდ ბევრი ინფრასტრუქტურული პროექტები ხორციელდება დიდი დაფინანსება აქვე თითოეულ მუნიციპალიტეტს და რა თქმა უნდა ნებისმიერ კორუფციული საფრთხე უნდა იყოს აღმოფხვრილი. რაც შეეხება ბორჯომის მუნიციპალიტეტის მერიას აქ შემდეგი კვირიდან მერის მოადგილე შეასრულებს მოვალეობას და არანაირი პრობლემა არ შეიქმნა. ასევე საკრებულოშიც ჰყავთ მოადგილეები და კანონით იქაც მოადგილე შეასრულებს მოვალეობას“, - განაცხადა ბესიკ ამირანაშვილმა.

სახელმწიფო უსაფრთხოების სამსახურის ანტიკორუფციულმა სააგენტომ ქრთამის აღების ფაქტზე ბორჯომის მუნიციპალიტეტის საკრებულოს თავმჯდომარე გიორგი გოგიჩაიშვილი და ბორჯომის მუნიციპალიტეტის მერი ლევან ლიპარტია დააკავა.