ანდრიუს კუბილიუსი: მოხარულები ვიქნებით, თუ მმართველ პარტიასა და ოპოზიციას შორის შეთანხმების შესაძლებლობა იქნება

ჩვენ განვიხილეთ მიმდინარე მოლაპარაკებები, მმართველი გუნდის მიერ ოპონენტებისთვის შეთავაზებული პაკეტი და ამის შესახებ დეტალური ინფორმაცია მივიღეთ. შეთაზება საინტერესოა, მაგრამ არ ვიცი როგორ განვითარდება მოვლენები. ჩვენ ვემხრობით და მოხარულები ვიქნებით, თუ იქნება შეთანხმების შესაძლებლობა მმართველ პარტიასა და ოპოზიციას შორის, - ამის შესახებ ლიეტუვის ყოფილმა პრემიერმა, ანდრიუს კუბილიუსმა „ქრონიკასთან“ განაცხადა.

მისი თქმით, მიმდინარეობს მზადება მისიისთვის, თუმცა ჯერჯერობით არ არის დაზუსტებული როდის გაემზავრება მისია საქართველოში.

„მისია იქნება რამდენიმე საკითხზე. ეს ეხება საარჩევნო სისტემას და რასაც ჩვენ პოლიტიკურ დევნას ვუწოდებთ. ჩვენ გვაქვს იმედი, რომ გარკვეული საკითხები გაუმჯობესდება და მმართველი პარტია მიხვდება, თუ რა ზიანი შეიძლება საქართველოს სანდოობას მიადგეს. ჩვენი გზავნილი ისევ და ისევ იგივეა. გლობალურად არ არის მარტივი პერიოდი. კორონა, სირია, ლტოლვილები და ჩვენთვის აღმოსავლეთ პარტნიორობა ძალიან მნიშვნელოვანია. ეს მნიშვნელოვანია განსაკუთრებით სამიტის წინ. ჩვენ გვსურს კარგი ახალი ამბები ამ ინციატივის მონაწილე ყველა ქვეყნიდან და ამიტომ არის ჩვენი ასეთი ინტერესი. როგორც ინფორმაცია მოგვაწოდეს, მმართველი გუნდი ცდილობს სხვა პარტიები დარწმუნებას ევროპარლამენტში, რომ მოხდეს საქართველოზე რეზოლუციის მიღების გადადება. ჯერ არ ვიცი, რა იქნება. „ევროპის სახალხო პარტიის“ (EPP)პოზიციაა, რომ მივიღოთ რეზოლუცია და გუშინ ჩვენ ამის შესახებ პოზიცია დავაფიქსირეთ. რეზოლუციაში საუბარი იქნება მიმდინარე პროცესებზე, პოლიტიკურ კრიზისზე, არჩევნებზე, პოლიტიკურ პატიმრებზე, ოკუპაციაზე, საქართველოს სუვერენიტეტის მხარდაჭერაზე, რეფორმებზე, აღმოსავლეთ პარტნიორობაზე. არგუმენტი მარტივია. მისია უნდა ჩამოვიდეს საქართველოში და უმჯობესი იქნება მას დაველოდოთ“ - განაცხადა ანდრიუს კუბილიუსმა.