არჩილ თალაკვაძე: საარჩევნო ბარიერზე ოპოზიციის საკმაოდ დიდმა ნაწილმა უკვე გამოხატა მხარდამჭერი პოზიცია

„საარჩევნო ბარიერი არის ის საკითხი, რომელზეც ოპოზიციის საკმაოდ დიდმა ნაწილმა უკვე გააკეთა თავისი მხარდამჭერი პოზიციები. თქვეს რომ შედარებით დაბალი ბარიერი არის მათთვის სასურველი. ასევე ჩვენ ამ სამი-ოთხი დღის განმავლობაში მოვისმინეთ მთელი რიგი ოპოზიციური პარტიების ლიდერების ირიბი თუ პირდაპირი მხარდამჭერი განცხადებები, უკვე მოლაპარაკების პროცესში დადებულ შეთავაზებასთან დაკავშირებით“, - ამის შესახებ გადაცემაში „დღის ქრონიკა“ პარლამენტის თავმჯდომარე, არჩილ თალაკვაძემ განაცხადა.

მისი თქმით, საპარლამენტო ოპოზიციას ჯერ კიდევ რჩება სასაუბრო. „როგორც ჩანს მათ კიდევ აქვთ ინტერესი პროპორციებთან დაკავშირებით. ჩვენ არ ვაპირებთ მანდატებით ვაჭრობას. საარჩევნო სისტემა არ არის მათი კუთვნილება, არც ჩვენი საკუთრება.რომ ჩვენ რაღაც ვაჩუქოთ ან მათ დათმონ მანდატები. და ეს ერთმანეთს წამოვაძახოთ. საარჩევნო სისტემა ეკუთვნის საზოგადოებას, ხალხს. შესაბამისად ჩვენ ვალდებულები ვართ საზოგადოებას, ხალხს შევთავაზოთ ისეთი შეთანხმება და საარჩევნო სისტემა სადაც მათი ინტერესები და მომავალი განვითარების ინტერესები იქნება გათვალისწინებული“, - აღნიშნა თალაკვაძემ.

მისი თქმით, მომდევნო მოლაპარაკების ფარგლებში ჯერ კიდევ რჩება სივრცე, რომ განხილული იყოს ეს საკითხები. „არის ეს ბარიერი თუ მაჟორიტარულ და პროპორციულ მანდატებს შორის განაწილება. აქ 5 მანდატით მეტი თუ ნაკლები ჩვენთვის არ არის პრინციპული. ეს არის მეორეხარისხოვანი საკითხი მას შემდეგ რაც ძირითად თემებზე შესაძლებელია შედგეს შეთანხმება. ძირითადი თემებია, თუ როგორი იქნება რეალურად 2020 წლის არჩევნები. როგორი იქნება 2024 წლის არჩევნები. და იქნება თუ არა დაკმაყოფილებული ეს 40%-იანი ზღვარი“, - განაცხადა თალაკვაძემ.

„ქართული ოცნება“ საარჩევნო სისტემაზე საკონსტიტუციო ცვლილებების პროექტს რამდენიმე დღეში წარადგენს. მმართველი გუნდის შეთავაზებით, გამარჯვებული სუბიექტი 40 პროცენტზე ნაკლები მხარდაჭერის შემთხვევაში 75 მანდატზე მეტის მოპოვებას ვერ შეძლებს და მთავრობას ვერ დააკომპლექტებს.

საპარლამენტო უმრავლესობის ლიდერის, მამუკა მდინარაძის განცხადებით, თუ ოპოზიცია ცოტაოდენ პასუხისმგებლობას გამოიჩენს, მხარეები შეთანხმებას მიაღწევენ, რისთვისაც საბოლოო ვადა 9 მარტია.

ოპოზიციაში აცხადებენ, რომ პარტიამ მთავრობის დასაკომპლექტებლად ხმების მინიმუმ 40% უნდა მიიღოს, რაც პროპორციული წესით 130 დეპუტატის, ხოლო 20-ის კი მაჟორიტარულით არჩევას ნიშნავს.