დავით უსუფაშვილი: თუ შეთანხმება შედგა, ეს არ იქნება ვინმეს გამარჯვება ან მარცხი

თუ იქნება შეთანხმება, ეს არ იქნება ვინმეს გამარჯვება და ვინმეს დამარცხება, გამარჯვებულებს და დამარცხებულებს ოქტომბერში დავითვლით, - ამის შესახებ „შენების მოძრაობის“ ლიდერმა დავით უსუფაშვილმა ოპოზიციისა და ხელისუფლების წარმომადგენლების შეხვედრის დაწყებამდე განაცხადა.

მისივე თქმით, დრო აღარ ითმენს და ამ დღეებში ჩვენ ან შეთანხმებულ თანაფარდობებს მოვისმენთ, ან უნდა ვაღიაროთ, რომ ვერ შევძელით შეთანხმება.

მე ყოველთვის ვამბობდი რომ ვიყავი ზომიერად ოპტიმისტი, დღეს ვარ უფრო მეტად ოპტიმისტი, სწორი მიმართულებით ბრძოლას და შრომას ყოველთვის მოაქვს შედეგი და მე ვარ იმედით სავსე, რომ დღეს მივაღწევთ ამ შედეგს. თუ იქნება შეთანხმება, ეს არ იქნება ვინმეს გამარჯვება და ვინმეს დამარცხება, გამარჯვებულებს და დამარცხებულებს ოქტომბერში დავითვლით, ახლა საჭიროა ყველამ გადავდგათ ნაბიჯები იქითკენ, რომ საქართველოში ჩატარდეს არჩევნები და ხალხს ჰქონდეს შესაძლებლობა თავისუფალი არჩევანი გააკეთოს.

ამ მიმართულებით კომპრომისული ნაბიჯების გადადგმის დიდი ალბათობა არსებობს, ეს ეხება ყველა საკითხს - მეტი პროპორციულობის საკითხს, საარჩევნო ოლქების თანაბრობისკენ ნაბიჯებს, პოლიტიკური ოპონენტების პოლიტიკური დევნისგან თავის შეკავებისკენ გადადგმული ნაბიჯებს.

ოპოზიციის ფორმულა იყო რომ 40%-ზე ნაკლები შედეგით ვერ დაკომპლექტდეს უმრავლესობა პარლამენტში და მე მგონია, რომ ამ საკითხზე შეიძლება იყოს შეთანხმება, სწორედ პროპორციულ და მაჟორიტარულ მანდატებს შორის სათანადო პროპორციის დაცვით. ამ დღეებში ჩვენ ან მოვისმენთ შეთანხმებულ თანაფარდობებს, ან უნდა ვაღიაროთ, რომ ვერ შევძელით შეთანხმება. დრო აღარ ითმენს“, - განაცხადა უსუფაშვილმა.

„ქართული ოცნება“ საარჩევნო სისტემაზე საკონსტიტუციო ცვლილებების პროექტს რამდენიმე დღეში წარადგენს. მმართველი გუნდის შეთავაზებით, გამარჯვებული სუბიექტი 40 პროცენტზე ნაკლები მხარდაჭერის შემთხვევაში 75 მანდატზე მეტის მოპოვებას ვერ შეძლებს და მთავრობას ვერ დააკომპლექტებს.

საპარლამენტო უმრავლესობის ლიდერის, მამუკა მდინარაძის განცხადებით, თუ ოპოზიცია ცოტაოდენ პასუხისმგებლობას გამოიჩენს, მხარეები შეთანხმებას მიაღწევენ, რისთვისაც საბოლოო ვადა 9 მარტია.

ოპოზიციაში აცხადებენ, რომ პარტიამ მთავრობის დასაკომპლექტებლად ხმების მინიმუმ 40% უნდა მიიღოს, რაც პროპორციული წესით 130 დეპუტატის, ხოლო 20-ის კი მაჟორიტარულით არჩევას ნიშნავს.