ანდრიუს კუბილიუსი: შევპირდი „ქართულ ოცნებას“, რომ შეთანხმების შემთხვევაში ღიად შევაქებდი

„ეს არის უმნიშვნელოვანესი საკითხები საქართველოს მომავლისთვის და ამიტომ მათზე შეთანხმება იყო აუცილებელი“, - ამის შესახებ ლიეტუვის ყოფილმა პრემიერ-მინისტრმა ანდრიუს კუბილიუსმა „ქრონიკას“ მთავრობასა და ოპოზიციას შორის მიღწეული შეთანხმების კომენტირებისას განუცხადა.

„მინდა, ყველას მოგილოცოთ. ვულოცავ ამ მართლაც წინგადადგმულ ნაბიჯს საქართველოში პოლიტიკურ პარტიებს, რომლებმაც შეძლეს ეს შედეგი დამდგარიყო. ჩვენ თქვენი გულშემატკივრები ვართ და გილოცავთ ყველას.

ეს არის უმნიშვნელოვანესი საკითხები საქართველოს მომავლისთვის და ამიტომ მათზე შეთანხმება იყო აუცილებელი. მე შევპირდი „ქართულ ოცნებას“, მმართველ პოლიტიკურ ძალას, რომ შეთანხმების შემთხვევაში, მე მათ ღიად შევაქებდი და ამას ვაკეთებ ახლა.

მოხარულები ვართ და ვამბობთ, რომ ძალიან, ძალიან მნიშვნელოვანი რამ მოხდა. ეს ნაბიჯი ძალიან სასარგებლოა საქართველოსთვის, ვინაიდან გასულ წელს არასწორმა ნაბიჯებმა, რაც უკავშირდებოდა დაპირების შესრულებაზე უარის თქმას, შეარყია საქართველოში დაგეგმილი საპარლამენტო არჩევნების მიმართ ნდობა.

მინდა გითხრათ, რომ ამ შეთანხმებით ნდობა საქართველოს მიმართ ბრუნდება და ძალიან მოხარულები ვართ ამით. კონსენსუსის მიღწევა და კომპრომისზე წასვლა დემოკრატიის წესია.

უფრო მეტად პროპორციული სისტემა ნამდვილად მიღწევაა და ეს მაგალითია აღმოსავლეთ პარტნიორობის ინიციატივის მონაწილე ქვეყნებისთვისაც.

მაგალითია იმის, თუ როგორ უნდა გადაიჭრას და როგორ უნდა მოიქცენენ მსგავს პოლიტიკურ კრიზისებში. ჩვენი გზავნილი საკმაოდ მკაფიო იყო ყოველთვის ოპონენტების დაკავებაზეც. არჩევნების წინ, ოპოზიციური პარტიების ლიდერების სამართლებრივი დევნა და დაკავება არ არის ევროპული დემოკრატიის მაჩვენებელი.

ასე დემოკრატია ევროპულ ქვეყნებში არ მუშაობს. ეს აზარალებს ქვეყანას. საქართველოზე დებატები ევროპარლამენტში ძალაშია. წინა კვირას მომზადებული იყო პროექტი რეზოლუციის, მაგრამ უნდა აღინიშნოს, რომ შეთანხმების შემდეგ პროექტი აშკარად შესაცვლელია.

სახეზეა მოვლენების პოზიტიურად განვითარება და ეს აუცილებლად უნდა აისახოს რეზოლუციაში, რომლის მიღებას ევროპარლამენტი აპირებს. დღეს გვექნება პოლიტიკურ ჯგუფების შეხვედრა. უნდა შეიცვალოს პროექტის ის ნაწილი, რაც უკავშირდებოდა პროპორციულ სისტემაზე გადასვლას და ამ მიმართულებით ევროპარლამენტის მოწოდებას. პროექტში იყო გამოთქმული შეშფოთება და ნეგატიური განვითარება იყო ასახული, მაგრამ ეს უნდა შეიცვალოს. დღეს საქართველო იმსახურებს პოზიტიურ შეფასებას და ეს სულისკვეთება უნდა ჰქონდეს ევროპარლამენტს“, - განაცხადა კუბილიუსმა.

ოპოზიცია და ხელისუფლება 2020 წლის არჩევნების 120/30-ზე მოდელით ჩატარებაზე შეთანხმდა.