ანრი ოხანაშვილი: შეუძლებელია ადამიანს, რომელმაც სახელმწიფო ბიუჯეტს 50 მილიონი მოჰპარა, პოლიტპატიმარი ეწოდოს

საქართველოში პოლიტპატიმრები არ არსებობენ. შეუძლებელია, ადამიანს პოლიტპატიმარი ეწოდოს, რომელმაც სახელმწიფო ბიუჯეტს 50 მილიონი მოჰპარა, - ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა ჟურნალისტებს განუცხადა.

„შეუძლებელია, პოლიტპატიმრის სტატუსზე ვისაუბროთ იმ ადამიანებთან მიმართებაში, ვინც ძალადობდნენ პოლიციელებზე, რომლებიც პარლამენტში შემოჭრას და საკანონმდებლო ორგანოს შტურმით აღებას ცდილობდნენ. ამ ადამიანებთან მიმართებაში პოლიტპატიმრის სტატუსზე ვერ ვისაუბრებთ. ეს არ არის მხოლოდ ჩემი შეფასება. პირდაპირ ეთერში ყველამ ვნახეთ კადრები, თუ როგორ ხდებოდა პოლიციელებზე ძალადობა. ამ ადამიანებთან მიმართებაში, რომელ პოლიტპატიმრის სტატუსზეა საუბარი? გიგი უგულავამ, რომელიც სააპელაციო სასამართლოს მიერ დამნაშავედ იქნა ცნობილი, თავად არ გაასაჩივრა მისი დამნაშავედ გამოტანილი გადაწყვეტილება და ეს არის საფუძველი, რომ ვინმეს პოლიტპატიმრის სტატუსზე ვისაუბროთ? შეუძლებელია, დემოკრატიულ სახელმწიფოში ამ ბრალდებების ქვეშ მყოფ პირებთან მიმართებაში ვინმეს პოლიტპატიმრის სტატუსზე საუბარი. რაც შეეხება შეთანხმებას, შეთანხმება მიღწეულია. ამ შეთანხმებაში "ქართულმა ოცნებამ" დიდი როლი ითამაშა იმისთვის, რომ ქვეყნისა და საზოგადოების სტაბილური განვითარება ყოფილიყო დღის წესრიგში დარჩენილი და რისკები არ ყოფილიყო იმასთან დაკავშირებით, რომ შესაძლოა, სტაბილურობას შეექმნას საფრთხე. ჩვენთვის პრიორიტეტულად მნიშვნელოვანი იყო ქვეყნის გრძელვადიანი და სტაბილური განვითარება. საზოგადოების დაკვეთაა სტაბილურ ქვეყანაში ცხოვრება. იმის ფუფუნება არ გვაქვს, რომ სამთავრობო კრიზისების ფონზე წარიმართოს პოლიტიკური ცხოვრება. ჩვენ მიერ შემუშავებული მოდელი ითვალისწინებს, როგორც მაჟორიტარულ კომპონენტს, ასევე პროპორციულს. ეს არის მაქსიმალურად დაახლოებული მოდელი პროპორციულ სისტემასთან, ასევე უზრუნველყოფილია ქვეყნის გრძელვადიანი სტაბილური განვითარება. შეთანხმებაში არსად დაფიქსირებულა და ვერ ნახავთ, რომელიმე გვარზე მითითებას, რომ თურმე, ვინმე შეთანხმდა რომელიმე პირის პოლიტპატიმრის სტატუსთან დაკავშირებით. როგორ წარმოგიდგენიათ შეთანხმება სამართლებრივ სახელმწიფოში? პოლიტიკოსები რაზე თანხმდებიან - მოსამართლე ვინმეს გამოუშვებს? არ არსებობს დიპლომატიური ენა იმასთან დაკავშირებით, რომ ვინმემ გაბედოს, ჩაერიოს მართლმსაჯულებაში პოლიტიკური დღის წესრიგის სტაბილურობის მიზნით. ასეთი რამე არ არსებობს. თუ ოპოზიცია იტყვის, რომ რომელიმე ცივილურ სახელმწიფოში არსებობს პრეცედენტი, რომ პოლიტიკოსები დიპლომატიურ კორპუსთან ერთად შეთანხმდნენ, ვინმეს პოლიტპატიმრის სტატუსი მიენიჭოს, ვინმე ციხიდან გამოუშვან და ვინმე დაიჭირონ, ეს არის ნონსენსი. ასეთი შეთანხმება არ ყოფილა“, - განაცხადა ოხანაშვილმა.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდა. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.