არჩილ თალაკვაძე: ვისაც აქვს სურვილი დაეხმაროს თანამოქალაქეებს, ამისთვის არ არის საჭირო ზედმეტი პოლიტიკური მანიპულაციები

ჩვენს ოპონენტებს აქვთ ალბათ თავისი ხედვა. მართალია, ზოგიერთს ცუდად გამოუვიდა თავისი ინიციატივების განხორციელება და რისკის ქვეშაც დააყენეს მოქალაქეები, მაგრამ კიდევ ერთხელ ვამბობ, დღეს ჩვენ არ გვაქვს დრო ამ ხალხის გაკიცხვით ვიყოთ დაკავებული, - ამის შესახებ საქართველოს პარლამენტის თავმჯდომარემ არჩილ თალაკვაძემ გადაცემა „ღია ეთერში“ განაცხადა.

მისი თქმით, ხელფასის ნაწილის კორონავირუსთან ბრძოლის ფონდში გადარიცხვის ინიციატივა არც შეჯიბრია და ამით ხელისუფლება არც ოპონენტებს უმტკიცებს რამეს, არამედ ამით მმართველი გუნდი თავისი პასუხისმგებლობის მიმართ დამოკიდებულებას აჩვენებს. ამ თემაზე პარლამენტის თავმჯდომარემ კორონავირუსთან ბრძოლის თემაში ოპოზიციის ჩართულობის მნიშვნელობაზე ისაუბრა.

„ახლა არ არის დრო, როდესაც ვიღაცის გაკიცხვა ან ვიღაცისთვის ჭკუის სწავლება არის საჭირო, მიუხედავად იმისა, რომ ჩვენი ოპონენტები მთელ დროს ხარჯავენ, რომ როგორმე დისკრედიტაცია გაუწიონ ხელისუფლების მიერ გადადგმულ ნაბიჯებს და როგორმე ჩრდილი მიაყენონ იმ მოქმედებებს და შედეგებს, რასაც ჩვენ ყველამ ერთად მივაღწიეთ", - აღნიშნა პარლამენტის თავმჯდომარემ.

მისი თქმით, თუ პოლიტიკურ პარტიებს სურთ, მსგავსი გადაწყვეტილებები მიიღონ, მათ ეს თავისუფლად შეუძლიათ. "ეს არის მათი პასუხისმგებლობა. არასდროს ვყოფილვართ იმის იმედად, როცა ქვეყანა გაჭირვების წინაშე დადგებოდა, ოპოზიციური პარტიების დაფინანსების იმედად უნდა ყოფილიყო. ჩვენ ვართ ხელისუფლებაში და მთავარი პასუხისმგებლობა არის ჩვენზე და ჩვენ ჩვენს მისაღებ გადაწყვეტილებებს ვიღებთ. ყველას, მათ შორის ჩვენს ოპონენტებს, ვისაც აქვს სურვილი დაეხმაროს თანამოქალაქეებს, დაეხმაროს ქვეყანას, ამისთვის არ არის საჭირო ზედმეტი პოლიტიკური მანიპულაციაები. არ არის საჭირო ზედმეტი პრეზენტაციები. ყველაფერი არის მარტივად. ორი გადაადგილებით შეგიძლიათ გააკეთოთ ტრანზაქცია და გადარიცხოთ თანხა კორონავირუსის წინააღმდეგ ბრძოლის ფონდში. სხვა ნებისმიერი დახმარება, იქნება ეს შეჭირვებულთა დახმარება, იქნება ეს საზღვარგარეთ მყოფი ჩვენი მოქალაქეებისთვის დახმარება, ამის გაკეთებას სპეციალური შესავალი კამპანიები არ სჭირდება. როგორც მარტივად მივიღეთ ეს გადაწყვეტილება და ვუთხარით საზოგადოებას, ასევე მარტივად შეუძლიათ სხვებსაც ეს გადაწყვეტილება მიიღონ", - განაცხადა პარლამენტის თავმჯდომარემ.