მამუკა მდინარაძე ოპოზიციას შეთანხმებიდან გასვლისა და საარჩევნო სისტემის არევის მცდელობაში ადანაშაულებს

პარლამენტის ვიცე სპიკერმა მამუკა მდინარაძემ ოპოზიციასთან 8 მარტს მიღწეული შეთანხმების სადაო ნაწილი განმარტა.

მამუკა მდინარაძემ გადაცემაში „დღის ქრონიკა“ დოკუმენტიდან ამონარიდი წაიკითხა, რომელშიც მისი თქმით, წერია, რომ „მიუხედავად განსხვავებული აზრისა, ყველანი ვთანხმდებით, რომ აუცილებელია რეაგირება ქმედებებზე, რომელიც შესაძლოა, აღქმული იყოს როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იყოს აცილებული“.

„თუ ასეთი აღქმაც კი გაჩნდებოდა, რომ ნებისმიერი მოქმედებით მოხდებოდა მართლმსაჯულების პოლიტიზაცია, ამის გამორიცხვაზეა საუბარი - აქ არ წერია არც პოლიტიკური პატიმარი, არ წერია ვინმეს გათავისუფლება და მინიშნებაც კი არ არის ამასთან დაკავშირებით - ახლა ჩვენ გვიმტკიცებენ, რომ აქ რაც წერია, ამისგან 180 გრადუსით განსხვავებულ შეთანხმებაზე იყო იქ საუბარი. ისინი ამბობენ, რომ ერთი დავწერეთ და მეორეზე შევთანხმდით“, - აღნიშნა მამუკა მდინარაძე.

მისივე თქმით, ოპოზიციასთან ყველა შეხვედრაზე ძირითადი საკითხი იყო საარჩევნო სისტემა.

„ბოლოს მივედით შეთანხმებამდე - 130/20-ზე. ყველა შეხვედრაზე იყო მცდელობა, რომ პარალელურად წამოჭრილიყო ე.წ პოლიტპატიმრების საკითხი. მერე, ამ პერიოდში ჩვენი უცხოელი პარტნიორები და კოლეგები იყვნენ ჩამოსულები კონფერენციაზე, მიუტანეს ციფრები, რომ თუ არ ვცდები, 84-მდე პოლიტპატიმარია საქართველოში. შემდეგ 2 თუ სამი აღმოჩნდა პატიმარი და არა პოლიტპატიმარი.

ასეთი სპეკულაციები სულ იყო და ბოლო შეხვედრაზე, როდესაც ჩვენი წარმომადგენლები მივიდნენ და გუნდშიც ასეთი შეთანხმება იყო, რა თქმა უნდა, მათ მოაწერეს ხელი 130/20-თან დაკავშირებით შეთანხმებას და აგრეთვე იყო მეორე ხელშეკრულება, ზოგადი დანართი, განცხადება იმის შესახებ, რომ პოლიტიკა არ უნდა ჩაერიოს მართლმსაჯულებაში. საბოლოოდ ამაზე იყო შეთანხმება იმიტომ, რომ ვინმეს დამატებითი სპეკულაციების საშუალება არ მისცემოდა.

არც წინა და არც ბოლო შეხვედრაზე ყოფილა ფაქტი, სადაც ვინმე დაეთანხმა იმას, რომ პოლიტპატიმრები არიან, ეს შეუძლებელი იყო, ასეთ საოცრებას არ დაუშვებდნენ ჩვენი წარმომადგენლები, არც არის ასე და ამას ვერც დაეთანხმებოდნენ მმართველი გუნდის წარმომადგენლები“, - განაცხადა მამუკა მდინარაძემ.

კითხვაზე, ხომ არ წავა „ქართული ოცნება“ რაღაც დათმობაზე, რომ ოპოზიციას სალაპარაკო არ ჰქონდეს და მაგალითად თქვას, რომ არ იქნება წინააღმდეგი, თუ პრეზიდენტი შეიწყალებს, მამუკა მდინარაძემ განაცხადა, რომ „ქართული ოცნების“ საქმე არ არის რას იზამს პრეზიდენტი და ინსტიტუტს შეურაცხყოფას ვერ მიაყენებენ.

„ისინი ამბობენ ასე რაღაცას - ამერიკის ელჩი, ევროკავშირის ელჩი, გერმანიის ელჩი ისხდნენ და ჩვენ შევთანხმდით იმაზე, რომ „ქართული ოცნება“ ჩაერეოდა - ჯერ ერთი, უნდა ეღიარებინა „ქართულ ოცნებას, რომ ისინი პოლიტპატიმრები არიან, რას ნიშნავს გამოვუშვებთ, როგორ უნდა გამოვუშვათ?! რა შენი საქმეა მათი გამოშვება?! ისეთ რამეს ამბობენ, რომ არ შეიძლება ლოგიკასთან მოვიდეს და საერთოდ ფაქტი არ ყოფილა“, - აღნიშნა მამუკა მდინარაძემ.

მისივე თქმით, პოლიტპატიმრების თემის შემოტანას ოპოზიცია ყველა შეხვედრაზე, სულ ცდილობდა, მაგრამ თანხმობა იყო თუ არა, ეს არის მთავარი. მამუკა მდინარაძემ განმარტა, რომ არც ერთი წუთი თუ წამი, „ქართული ოცნების“ წარმომადგენლების მხრიდან სიტყვა არ ყოფილა გაცემული თანხმობის სახით.

მან ოპოზიციის სპეკულაციებს შეთანხმებიდან გასვლისა და საარჩევნო სისტემის არევის მცდელობა უწოდა.

„შემდეგ ალბათ უმიზნებენ ლეგიტიმაციის საკითხს - რა მიზნები აქვთ, ზუსტად არ ვიცი, მაგრამ რაღაც კონტურები ჩანს იმის, რომ სიტუაცია არიონ, შეთანხმებიდან გავიდნენ და მიზეზად ეს მოაქვთ. ჩემი აზრით, იმ შეხვედრის ყველა მონაწილემ უნდა თქვას, დაეთანხმნენ თუ არა ამ საკითხს „ქართული ოცნების“ წარმომადგენლები და დადეს თუ არა პირობა, რომ მათ გამოუშვებდნენ. თურმე ამერიკელი და გერმანელი, ასევე სხვა პარტნიორები უსმენენ შეთანხმებას და მმართველი გუნდი ამბობს, რომ ჩვენ მათ გამოვუშვებთ, ყველაფერში ჩავერევით და ასე შემდეგ“, - აღნიშნა მამუკა მდინარაძემ.

ოპოზიცია აცხადებს, რომ შეთანხმება შედგა გიგი უგულავას, გიორგი რურუასა და ირაკლი ოქრუაშვილის გათავისუფლებაზე. დღეს არჩილ თალაკვაძემ მოლაპარაკების ფასილიტატორ ელჩებს სთხოვა, ნათელი მოჰფინონ ოპოზიციასთან შეთანხმების შინაარსს.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდა. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.