გიორგი ვაშაძე: თუ ჩვენ ახლა დათმობაზე ვიფიქრებთ, „ქართული ოცნება“ ყველაფერში გადაგვაგდებს

ჩვენს ერთიან პოზიციას გადამწყვეტი მნიშვნელობა აქვს, ეს უნდა გვესმოდეს. თუ ჩვენ ახლა რაღაცას წავუყრუებთ, რაღაც დათმობაზე ვიფიქრებთ, დამერწმუნეთ, „ქართული ოცნება“ მიჩვეულია გადაგდებას, მოტყუებას, თაღლითობას და ის აბსოლუტურად ყველაფერში გადაგვაგდებს. ამიტომ არც ერთი ნაბიჯი უკან, მხოლოდ და მხოლოდ წინ, იმიტომ რომ ეს არის ქვეყნისა და ხალხისთვის საჭირო, - ამის შესახებ „ახალი საქართველოს“ თავმჯდომარემ, გიორგი ვაშაძემ ჟურნალისტებს ოპოზიციის კონსულტაციების დაწყებამდე განუცხადა. მან ის საკითხებიც დაასახელა, რაზეც პარტიები დღეს იმსჯელებენ.

„პირველი - მოთხოვნა არის ერთიანი, რომ როგორც პოლიტპატიმრების გათავისუფლება, ასევე საარჩევნო სისტემა უნდა შეიცვალოს. მეორე - ამას უჭერს სრულად მხარს ევროკავშირი და ამას უჭერს სრულად მხარს ამერიკის შეერთებული შტატები, იმიტომ, რომ მათი წარმომადგენლები ესწრებოდნენ ამ მოლაპარაკებას და აქ ყველა საკითხი დასრულებულია. როგორც გახარიას უთქვამს, წერტილი დავსვათ, თუ გნებავთ. და მესამე, დღეს ვიკრიბებით, რომ კიდევ ერთხელ ყველა ოპოზიციურმა პარტიამ დააფიქსიროს თავისი აზრი, რის შემდეგაც საერთო განცხადებას გავავრცელებთ. იმედი მაქვს, რომ აქ სხვაობა არ იქნება ჩვენს პოზიციაში, ყველა ვიქნებით ერთიანები“, - განაცხადა ვაშაძემ.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

ოპოზიციის განცხადებით, შეთანხმება შედგა გიგი უგულავას, გიორგი რურუასა და ირაკლი ოქრუაშვილის გათავისუფლებაზეც. 11 მაისს არჩილ თალაკვაძემ მოლაპარაკების ფასილიტატორ ელჩებს სთხოვა, ნათელი მოჰფინონ ოპოზიციასთან შეთანხმების შინაარსს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.