სოზარ სუბარი: 8 მარტის შეთანხმება მოლოტოვ-რიბენტროპის პაქტი არაა, რომელსაც საიდუმლო მუხლები აქვს და წერია ვინ უნდა გამოვიდეს

8 მარტის შეთანხმება მოლოტოვ-რიბენტროპის პაქტი არაა, რომელსაც საიდუმლო მუხლები აქვს და წერია ვინ უნდა გამოვიდეს, მსგავსი მუხლები ამ შეთანხმებას არ ახლავს, იქ მკაფიოდ წერია: საარჩევნო სისტემა შეიცვლება, - მის შესახებ იმედის გადაცემა „ღია ეთერში“ პრემიერ-მინისტრის მრჩეველმა, სოზარ სუბარმა განაცხადა.

მისივე თქმით, „ნაციონალური მოძრაობა“ ხედავს, რომ საზოგადოებაში მხარდაჭერა არ აქვთ და ყველაფერს აკეთებენ, რომ საკონსტიტუციო ცვლილებები ჩააგდონ.

„ჩვენ მზად ვართ და დარწმუნებული ვარ, რომ საქართველოს პარლამენტში მოინახება ადამიანები, პოლიტიკური ძალები, რომლებთან ერთად ამის შეცვლას შევძლებთ. მიუხედავად იმისა „ნაციონალური მოძრაობის“ ორი განაყოფი რას იზამს და რა პოზიციას დაიკავებენ. ისინი ხედავენ მათ არ აქვთ საზოგადოებაში მხარდაჭერა და ყველაფერს აკეთებენ, რომ ეს საკონსტიტუციო ცვლილებები ჩააგდონ. დარწმუნებული ვარ, რომ სხვა ოპოზიური ძალები მხარს დაუჭერენ და შევძლებთ ამ ცვლილებების შეტანას. „ნაციონალური მოძრაობა“ ხედავს რომ არჩევნებს წააგებს და ყველაფერს ცდილობენ რომ ქვეყანაში ვითარება დაძაბოს და არეულობას მიაღწიონ. რაც შეეხება ჩვენს მეგობრებს და მათ დამოკიდებულებას საქართველოს მიმართ, მათი დამოკიდებულება ყველაზე კარგად გამოჩნდა, როდესაც საქართველომ უპრეცედენტო მცირე დროში უპრეცენდენტო დიდი ფინანსურ დახმარებაზე მიიღო მზადყოფნა და მნიშვნელოვანი ნაწილი ამ თანხის უკვე გამორიცხულია. ეს არის ქვეყნის, ეკონომიკური სტრუქტურის და დემოკრატიული ინსტიტუტების სიმტკიცის აღიარება, სხვანაირად ეს ვერ მოხდებოდა. ცუდია როდესაც ჩვენი მეგობარი ქვეყნებიდან არსებობენ პოლიტიკოსები, რომლებიც ამ ყველაფერს განსხვავებულად ხედავენ და ბოლო 8 წელია ერთსა და იმავე ამბობენ. „იმედი“ დაბრუნებაზეც კი აკეთებდნენ განცხადებას, რომ „იმედის“ დაბრუნება თითქოს იყო წართმევა, რაღაც საკუთრების უფლების შელახვა, მაშინ როდესაც ყველაფერი პირიქით იყო. არ ვიცი რატომ ფიქრობენ ასე, მაგრამ ფაქტი ერთია, რომ ჩვენ დასავლელი პარტნიორების ერთგული მოკავშირეები ვართ“, - აღნიშნა სოზარ სუბარმა.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

ოპოზიციის განცხადებით, შეთანხმება შედგა გიგი უგულავას, გიორგი რურუასა და ირაკლი ოქრუაშვილის გათავისუფლებაზეც. 11 მაისს არჩილ თალაკვაძემ მოლაპარაკების ფასილიტატორ ელჩებს სთხოვა, ნათელი მოჰფინონ ოპოზიციასთან შეთანხმების შინაარსს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.