კომისიის წევრების ნაწილს სტრასბურგისთვის შერჩეული მოსამართლეები არ მოსწონს

სახალხო დამცველის უჩა ნანუაშვილის განცხადებით, ის არ გამორიცხავს, რომ საქართველოდან ასარჩევი მოსამართლის შერჩევის პროცესი სტრასბურგში კიდევ ერთხელ ჩაიშალოს. ამის შესახებ ნანუაშვილმა ადამიანის უფლებათა ევროპული სასამართლოს მოსამართლეობის კანდიდატების შესარჩევი სამთავრობო საკონკურსო კომისიის სხდომის დასრულების შემდეგ განაცხადა. ინფორმაციას 1tv.ge ავრცელებს.

"პირველ ორ კანდიდატთან (ლადო ჭანტურია, სოფიო ჯაფარიძე) დაკავშირებით, არანაირი კითხვის ნიშანი არ გამაჩნია, თუმცა დანარჩენი კანდიდატების მიმართ არსებობს გარკვეული კითხვის ნიშნები", - განაცხადა უჩა ნანუაშვილმა.

სახალხო დამცველი საკონკურსო კომისიის რამდენიმე წევრის ობიექტურობასაც ეჭვქვეშ აყენებს.

"ასევე, კითხვის ნიშნები მაქვს კომისიის რამდენიმე წევრის ობიექტურობასთან დაკავშირებით. ზოგიერთი მაღალი კომპეტენციის კადრი სიის მიღმა დარჩა. არ გამოვრიცხავ, სტრასბურგში სესია კიდევ ერთხელ ჩაიშალოს და ჩასვლა მომიწიოს", - განაცხადა ნანუაშვილმა.

კომისიის მიერ შერჩეული მოსამართლეები არ მოსწონს არც ანა ნაცვლიშვილს. „კომისიის მხრიდან სასამართლო ხელისუფლებისთვის მესიჯია ის, რომ ნინო ბაქაქური, ვინც იყო იშვიათი მოსამართლე, რომელმაც 2008 წელს არსებული ვითარების გამო მოსამართლის მანტია გაიხადა და სააპელაციო სასამართლოდან წავიდა, ვერ მოხვდა საუკეთესო ხუთეულში, ხოლო სისტემის მორჩილმა მოსამართლეებმა გადასვლა შეძლეს“, - აცხადებს „ახალგაზრდა იურისტთა ასოციაციის თავმჯდომარე.

სამთავრობო საკონკურსო კომისიამ სტრასბურგის სასამართლოს მოსამართლეობის კონკურსში მონაწილეებიდან  ხუთი კანდიდატი შეარჩია. 

ჯამური ქულების მიხედვით, ლადო ჭანტურიამ, სოფიო ჯაფარიძემ, შოთა გეწაძემ, თამარ ალანიამ და ირაკლი დონდოლაძემ 23 კანდიდატს შორის კომისიის წევრების მხრიდან ყველაზე მაღალი ქულები მიიღეს. მათ შორის ყველაზე მაღალი კი გერმანიაში საქართველოს მოქმედმა ელჩმა ლადო ჭანტურიამ დაიმსახურა. 

ხუთკაციანი სია საქართველოს მთავრობას ივნისში გადაეგზავნება, საიდანაც მთავრობის წევრები შეარჩევენ სამ კანდიდატს, რომელთა დოკუმენტები ევროპის საბჭოს საპარლამენტო ასამბლეას წარედგინება, ხოლო სტრასბურგის სასამართლოში მოსამართლედ ერთი კანდიდატი ათწლიანი ვადით შეირჩევა.

ეს პოსტი უკვე რამდენიმე თვეა, ვაკანტურია. კანდიდატების შესარჩევად თავდაპირველად ქართულმა მხარემ კონკურსი გასულ წელს ჩაატარა და სამი კანდიდატი წარადგინა სტრასბურგის სასამართლოში. თუმცა გიორგი ბადაშვილის, ევა გოცირიძის და ალექსანდრე ბარამიძის კანდიდატურებიდან სასამართლოში სამუშაოდ არცერთი დამტკიცდა. პროცესის გაჭიანურების გამო, სტრასბურგში ქართველ მოსამართლეს ნინა წოწორიას თებერვლის შემდეგ უფლებამოსილების ვადა გაუგრძელდა.

სტრასბურგის სასამართლოს მოსამართლეობის მსურველ კანდიდატებთან გასაუბრება 27 მაისს დაიწყო და დღეს დასრულდა.